Convócase aos propietarios dos terreos afectados pola construción da senda peonil entre Ares e Mugardos para o inicio do proceso de expropiación

A Xunta convoca aos propietarios dos terreos afectados pola construción da senda peonil entre Ares e Mugardos para o inicio do proceso de expropiación. Esta actuación suporá unha inversión de preto de 1,5 millóns de euros, cofinanciados con Fondos FEDER 14/20, e unha mellora da seguridade viaria e a calidade ambiental e de vida dos veciños da zona. A actuación consiste na execución dun tramo de senda peonil na marxe esquerda da estrada AC-130.

O levantamento de actas das fincas afectadas no Concello de Mugardos realizarase o vindeiro mércores 14 de xuño e no Concello de Ares será os días 15 e 16 do mesmo mes.

A consellería de Infraestruturas e Vivenda, a través da Axencia Galega de Infraestruturas (AXI), executará un itinerario 660 metros, concibido para mellorar a seguridade das persoas, sobre todo, dos escolares da zona. Esta actuación xa foi licitada o pasado día 5 de este mes, momento que se realizou a publicación no DOG.

Nesta actuación, redefinirase a sección tipo existente, aumentando os anchos da calzada mediante a ampliación e redistribución da plataforma actual. Ademais, inclúense as diversas accións co fin de mellorar a funcionalidade da estrada, entre elas, a mellora da intersección existente na AC-130 coa avenida do Mazote e a estrada DP-0402, na entrada da zona urbana de Ares, coa implantación dunha glorieta. Tamén está prevista a mellora da curva situada entre os quilómetros 2,6 e 2,8, aumentando o seu radio en planta.

Así mesmo, habilitarase dúas paradas de bus, unha no concello de Mugardos e outra no concello de Ares, e disporanse pasos peonís nas zonas de cruce da calzada situadas nas proximidades dos dous colexios, na avenida do Mazote e na zona de esparexemento de Fontelide, en Ares. Proxéctase tamén unha pasarela de madeira para dar continuidade á senda sobre o Rego do Cacho. Os traballos complétanse coa obras de drenaxe, sinalización vertical e horizontal, reposición de varandas, proteccións peonís e balizamento.

A Consellería de Infraestruturas e Vivenda está a promover sendas útiles, sostibles e saudables para que os veciños poidan empregar as estradas de xeito seguro e accesible, ao tempo que mellora a seguridade de todos os usuarios da vía.

O Plan de Sendas de Galicia concreta a construción de 170 novos quilómetros de itinerarios peonís. O Goberno galego, a través da Axencia Galega de Infraestruturas, destinará este ano un total de 10,5 millóns de euros ao Plan, que xa dispón de 40 proxectos aprobados.