publicidade hoxe
Publicidade
omeulibro1

A mostra “Sorrisos Transformadores” chega ao concello de Lalín

PUBLICADO EN: Noticias de GaliciaLalínPontevedra
A-
A+

A exposición fotográfica da Deputación de Pontevedra e a Asociación de Familias de Persoas Trans* ARELAS “Sorrisos Transformadores” chega ao concello de Lalín, este venres 24 de marzo, dentro do programa de actos do Cocido do Orgullo. A deputada de Cohesión Social e Xuventude, Digna Rivas, acompañada polo alcalde Rafael Cuiña, será a encargada de inaugurar, ás 17.30 horas, a mostra de visibilización do colectivo LGTBI que levou a cabo a institución provincial en colaboración coa Asociación de Familiares con Menores Trans* ARELAS no marco da conmemoración do Día Internacional do Orgullo LGTBI, 28 de xuño,e que estará dispoñible neste espazo ata o venres 31 de marzo en horario de 8.00 a 15.00 horas de luns a vernes.

“Sorrisos transformadores” é unha exposición fotográfica composta por 10 imaxes. Esta campaña de visibilización positiva inclúe as imaxes de persoas alegres, orgullosas, que amosan unha parcela da súa vida que lles gusta e irán acompañadas cada unha dun texto que reflicte unha frase ou unha idea sobre cada unha desas persoas e da súa contorna. Entre as persoas retratadas inclúense persoas de referencia social, sexan ou non transexuais, pero si relacionadas coa realidade destas persoas pola súa profesión e que axudan á hora de transmitir a súa mensaxe: educadores e educadoras, xuristas, políticos e políticas, psicólogos e psicólogas… A exposición ten un carácter itinerante e permanencia no tempo, para prolongar a reflexión por parte da cidadanía.”Sorrisos Transformadores” nace co obxectivo de lles dar visibilización, sensibilización e naturalización ao colectivo trans e as súas familias, co fin de promover a igualdade de oportunidades e o respecto á diversidade.

As súas finalidades son as de, por unha banda, prever actitudes e comportamentos discriminatorios por orientación sexual ou identidade de xénero e, pola outra, combater o acoso escolar por estes dous motivos, favorecendo a visibilidade do alumnado LGTBI e a plena normalidade das orientacións sexuais e identidades de xénero. A este respecto, a campaña compleméntase cunha oferta de charlas informativas destinadas á comunidade escolar.

23 de marzo de 2017 | 17:53 • Sen comentarios

Comentarios pechados.