Presidencia investiu 176.000 euros na mellora de infraestruturas e dotacións do concello de Mondoñedo
O delegado territorial da Xunta, José Manuel Balseiro, destacou que a Vicepresidencia e Consellería de Presidencia, Administracións Públicas e Xustiza investiu 175.810 euros en varios proxectos de mellora das infraestruturas e dotacións do concello de Mondoñedo.
Balseiro afirmou que “as diversas liñas de colaboración da Consellería de Presidencia cos concellos axudan a impulsar as instalacións e os servizos públicos municipais sen que elo supoña unha carga para as administracións locais”.
Así, o concello de Mondoñedo recibiu 78.926,95 euros procedentes do Fondo de Compensación Ambiental, que investiu en reforzar a brigada de protección e mantemento de espazos naturais e na compra de dous vehículos pesados.
En concreto, o concello dispón grazas a esta orde dun camión volquete con pluma de máis de 3.500 quilogramos e dunha pala retroexcavadora con tres cazos. Ambos están destinados a labores de protección medioambiental; ao mesmo tempo, foi posible incrementar o persoal destinado a estas tarefas.
O Fondo de Compensación Ambiental ten unha liña de axudas non competitivas que permite a todos os concellos da provincia beneficiarse directamente das explotacións eólicas ubicadas no seu territorio. Están destinadas a sufragar actuacións propostas polos concellos que inciden directa ou indirectamente en labores de melloras medioambientais.
Tal e como subliñou Balseiro, estas subvencións “favorecen especialmente aos concellos rurais de Galicia, que son os que teñen maior superficie destinada a aproveitamento eólico”.
Por outra banda, a Consellería de Presidencia asinou un convenio co Concello de Mondoñedo polo que achega un orzamento de 70.000 euros para a adquisición e adecuación dunha finca situada no casco urbano da localidade, da que se fai cargo a administración local para evitar o seu deterioro e degradación ambiental.
Por último, mediante o programa de mellora de infraestruturas de uso público, a Consellería investiu 26.883,20 euros que se destinaron á reorganización do andar baixo do concello.