Panamá será país invitado na 18ª edición de Xantar
Panamá participará como país convidado na próxima edición de Xantar, Salón Internacional de Turismo Gastronómico, que se celebrará en Expourense en Galicia, España, entre o 1 e o 5 de febreiro de 2017, cunha caseta desde a que promocionará o destino turístico e dará a coñecer a súa oferta en distintos segmentos.
A presenza de Panamá neste evento mundial ten o obxectivo de situarse como “destino cosmopolita e sustentable, conxugando tradición e modernidade” e espertar o interese dos europeos para que gocen dos seus atractivos.
A 18ª edición de Xantar convértese nunha plataforma ideal para promocionar a gastronomía panameña, así como o turismo e os produtos agroalimentarios do país. Panamá contará cun restaurante propio dentro do salón que estará liderado polo Club Gastronómico de Panamá, unha asociación sen ánimo de lucro que pretende ensinarlle á comunidade panameña e internacional as virtudes da arte da gastronomía. O prato nacional por excelencia é o sancocho de galiña de patio ou pito, unha especie de cocido realizado con ñame e culantro e é un prato que se toma moi quente.
A delegación panameña que se desprace até Xantar participará ademais nas accións profesionais da feira como os shoowcooking en directo, ou as conferencias incluídas no 12º Encontro Internacional sobre Gastronomía Sustentable e Saudable. Ademais, organizaranse catas comentadas de produtos seleccionados.
Panamá únese así á lista de países convidados en Xantar, reforzando o carácter internacional do salón e a súa vinculación con América Latina. Antes participaron como convidados Costa Rica, Cuba, Perú, Francia, Arxentina, Portugal e México.
Esta participación materialízase a través da invitación realizada por esta feira internacional de Turismo Gastronómico, avalada polo Ministerio de Economía, Industria e Competitividade de España, á Autoridade de Turismo de Panamá.
AUTORIDADE DE TURISMO DE PANAMÁ
A Autoridade de Turismo de Panamá é unha entidade dependente do Goberno da República de Panamá orientada a fomentar e diversificar as fontes de crecemento e desenvolvemento económico a través da xestión turística, co fin de brindar un servizo eficiente que garanta a competitividade e a sustentabilidade en ofertas de turismo nas diferentes rexións do país. Ademais, promove o desenvolvemento turístico sustentable en Panamá, mediante a formulación e regulación de políticas, estratexias e accións que estimulen o investimento turístico, garantindo a calidade da xestión, promocionando a participación comunitaria nas accións propias do sector.
Dentro destas accións de promoción para o 2017, o ATP participará en 24 feiras internacionais: 6 eventos en Estados Unidos e Canadá, 9 en Centro e Sudamérica, 7 en Europa e 2 en Asia, entre as que se inclúe Xantar. Desde este organismo traballan para superar o número de visitas internacionais (máis de 1.800.000 entre xaneiro e setembro de 2016). España é o primeiro mercado europeo e o quinto país emisor de turistas a Panamá, detrás de Estados Unidos, Venezuela, Colombia e Brasil.
O turismo representa unha das principais actividades do país. As áreas primordiais céntranse no turismo de negocios, praias e comercio. A revista New York Times colocou a Panamá como un dos mellores lugares do mundo para visitar, xa que o país vive un bo momento económico, logo de recuperar fai máis de 15 anos o control da Canle.
PANAMÁ E GALICIA
A elección deste país como convidado, para a edición na que Xantar cumpre a súa maioría de idade, contribuirá de novo a estreitar os lazos comerciais e afectivos entre Panamá e Galicia, unidos a través da emigración. No século XX, Panamá absorbeu a unha gran parte da diáspora galega que optou por pór rumbo a esta República. O seu obxectivo: participar nas obras de construción dunha gran canle que enlazase o océano Pacífico co Atlántico e que na actualidade é unha das grandes obras de enxeñaría a nivel mundial.
Cabe destacar que nos anos 60 e 70, preto do 40% dos veciños das parroquias de Albarellos e Feás, no concello ourensán de Boborás, emigraron cara a este país para participar nas obras da Canle e permaneceron despois dedicándose a outros sectores como a hotelería ou o mobiliario. Na actualidade, os veciños de Boborás e os seus descendentes representan a comunidade máis numerosa de todas as españolas residentes no Istmo.
GASTRONOMÍA DE PANAMÁ
Panamá é un pequeno país cunha longa historia que tamén se reflicte na súa mesa. É o resultado da influencia histórica polas culturas amerindia, hispana, africana, e afroantillana. Caracterízase polo alto consumo de arroz en diferentes formas e preparacións, así como as sopas, sendo o sancocho a máis popular. Outros ingredientes son o millo, plátanos, galiña, carnes, peixes e mariscos, cos que se preparan diversos pratos e frituras. As raíces e tubérculos teñen preponderancia na dieta do panameño, destacándose a yuca, o ñame, o ñampí, o otoe e en menor grao a papa.