O proxecto SmartPeme levará a cabo seis cursos en xaneiro no Centro Exposalnés de Cambados

O Centro ExpoSalnés de Cambados acollerá, durante todo o mes de xaneiro, seis obradoiros ao abeiro do programa SmartPeme da Deputación de Pontevedra. SmartPeme ofértalles ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de persoas empresarias e de mozas e mozos autónomos.

As quendas para o mes de xaneiro, todas elas en horario de 19:00 horas, son as seguintes: o mércores 11 de xaneiro, “Desenvolve a túa propia estratexia de e-mail márketing”. O martes 17 impartirase “Fotografía os teus produtos ou servizos para as redes sociais”. O xoves desa mesma semana, o 19, “A túa páxina web en menos de 90 minutos”, ao que lle seguirá, o mércores 25, “Redes sociais para a empresa: é Twitter a túa solución?” e “Como facer unha campaña exitosa de publicidade en Google?”, o venres 27. Xa por último, o martes 31 de xaneiro, desenvolverase o obradoiro “Promove o teu perfil en Facebook con aplicacións externas”. A oficina SmartPeme de Cambados, no Centro ExpoSalnés, atópase no paseo da Calzada, s/n. As inscricións pódense facer no número de teléfono 886 202 020, no correo electrónico info.smartpeme@depo.es ou na páxina web www.smartpeme.depo.es.

Lembramos que o novo proxecto SmartPeme, en palabras da presidenta da Deputación, Carmela Silva, “é un novo modelo de servizo orientado á mellora competitiva das pemes e as persoas autónomas e á procura dunha melloría nas vendas e na eficacia e eficiencia das tarefas, o que abre novos campos de actuación e alcanza novos grupos de interese, coma os emprendedores, as asociacións empresariais e os axentes de dinamización en concellos”. Para iso, nas oficinas de SmartPeme no Porriño, Cambados, Pontevedra, Lalín, Ponteareas e Vigo estanse a poñer en marcha as seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial das persoas asesoras en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as pemes e, tamén, o impulso de novas carteiras de servizos de asesoramento.