O Consello Infantil de Castrelo de Miño acode ao Congreso dos Deputados para presentar as conclusións do último encontro dos Consellos de Participación

A concelleira de Deporte, Ensino, Protección Civil, Voluntariado e Participación Social de Castrelo de Miño, María Isabel Rodríguez Perdiz, e a representante do Consello Infantil de Castrelo de Miño, Edita Pousada Álvarez, asistiron hoxe ao Congreso dos Deputados á presentación das conclusións do IV Encontro de Consellos de Participación que se celebrou o pasado mes de novembro en Santander.

A xornada foi organizada pola Comisión de Dereitos da Infancia e Adolescencia do Congreso dos Deputados, pola Plataforma de Organizacións de Infancia a través da estratexia A Infancia Opina e UNICEF Comité Español a través do programa Cidades Amigas da Infancia.

A esta xornada parlamentaria acoden 8 mozos e mozas que representan á rede de Cidades Amigas da Infancia de Alcalá de Henares, Avilés, Málaga, Mollerusa, Navia, Villanueva de la Torre e Castrelo de Miño, sendo este municipio o único galego en participar. A través desta iniciativa, os mozos terán por vez primeira espazo directo na Cámara Baixa do Estado para levar as súas voces directamente aos deputados e deputadas.

A castrelominense Edita Pousada encargouse de expoñer as conclusións ás que se chegou durante o encontro en Santander no ámbito da educación. Pousada fixo fincapé na necesidade de implicar ao profesorado na impartición de docencia para fomentar o interese por parte dos alumnos, unha cuestión que se viu enturbada, en parte, desde que se obrigou aos profesores para dar clase de materias para as que non estaban capacitados. Tamén destacou a importancia de afrontar o problema do abandono escolar e de por que España é un dos países cun maior índice de abandono, do limitado acceso á educación por parte de moitas familias polo custo dos libros de texto así como do bullyng no ámbito escolar.

Todas estas cuestións expostas ante varios deputados e deputadas terminaron con diversas propostas, entre as que destacaron a posibilidade de crear equipos de mediación e de concienciar á comunidade educativa para erradicar o acoso escolar ou a de poñer en práctica o programa RELEO para reutilizar os libros de texto. 

A de Edita foi unha das seis relatorios que abarcaron, ademais da área de Educación, a de Protección, Saúde e Benestar, Igualdade de Oportunidades, Refuxiados e Participación. Unha vez presentadas, os diversos representantes dos grupos parlamentarios fixeron uso da súa quenda para alegacións, tras o cal presentáronse solicitudes por parte dos conselleiros e conselleiras.

De forma paralela á xornada, no vestíbulo de acceso ao Congreso dos Deputados pola rúa Cedaceros exponse desde hai uns días a exposición “A infancia Opina, unha mirada ao noso dereito para participar”, da Plataforma de Organizacións de Infancia.