O Concello de Bueu aproba as bases de subvencións para actividades culturais
O Concello de Bueu aprobou hoxe as bases e a convocatoria de subvencións para asociacións e entidades sen ánimo de lucro que desenvolveran actividades culturais no ano 2016. O prazo para solicitalas é de vinte días naturais a contar desde o seguinte ao da publicación no Boletín Oficial da Provincia de Pontevedra (BOPPO).
A convocatoria deste ano, que xa se pode consultar na páxina web do Concello de Bueu, consta dalgunhas novidades, que buscan que as subvencións sexan o máis obxectivas, transparentes e competitivas. Entre elas está a posibilidade de presentar as solicitudes ou ben no Rexistro Xeral, coma en anos anteriores, ou a través da sede electrónica do Concello.
O orzamento destinado para a convocatoria será de 25.000 euros, e serán subvencionables as actividades culturais dirixidas á realización de actuacións no eido cultural en todas as súas vertentes: musicais, literarias, plásticas, escénicas, audiovisuais, etnográficas, etc.
Dela quedan excluídas as actividades subvencionadas, no mesmo exercicio, a través doutras convocatorias ou plans do Concello, as actividades organizadas por asociacións coas que se asine un convenio de colaboración durante o ano 2016, os gastos de funcionamento das entidades e gastos correntes, as viaxes de ocio, as actividades que non teñan carácter de acceso público, os gastos de instrumentos e vestiario, as escolas e obradoiros de música (vai haber unha liña de subvencións aparte), os gastos gastronómicos, as actividades de carácter deportivo ou que non teñan que ver coa cultura.