A FIG ABANCA acolleu a rodaxe de varias escenas da serie galega Pazo de Familia
A Feira Internacional de Galicia ABANCA acolleu onte e o pasado luns nas súas instalacións a gravación de varias escenas da serie galega Pazo de Familia, a cal se emite con gran éxito na Televisión de Galicia.
Estas imaxes foron rodadas para dous capítulos da sexta tempada da serie, os cales se emitirán no mes de febreiro, e recollen momentos de gran importancia para a súa trama.
Para a súa gravación desprazouse ao recinto feiral un equipo da produtora da serie, que é Central de Telecontenidos. Este estivo composto por máis de 30 persoas, entre eles técnicos, actores, maquilladores, perruqueiros e persoal de produción.
Localización de ficción
Esta rodaxe no recinto súmase á da serie El Final del Camino, a cal se levou a cabo entre principios de agosto e finais de novembro do pasado ano (emítese a partir hoxe en TVE e TVG), e perfila ao recinto como unha excelente localización de ficción pola diversidade de espazos que alberga e polas súas dimensións.
Así mesmo, estas gravacións reflicten a diversificación da actividade que está a realizar a Feira Internacional de Galicia ABANCA, a cal tamén se fixo patente nos últimos meses acollendo novos eventos, como o IV Campionato Galego de Formación Profesional (Galicia Skills), ou organizando novas citas como a Feira da Enerxía de Galicia.