publicidade hoxe
Publicidade
omeulibro1

O presidente da Xunta asegura que Ferroatlántica non solicitou a segregación

PUBLICADO EN: Noticias de GaliciaA CoruñaCeeDumbríaLocal Portada
A-
A+
Europa Press

O presidente da Xunta, Alberto Núñez Feijóo, asegurou este mércores que Ferroatlántica non cursou ningunha solicitude de segregación das centrais hidroeléctricas situadas nos ríos Xallas e Grande dos fornos de ferroaliaxe instalados en Cee e Dumbría, un movemento que, en cambio, si trasladaría aos seus propios empregados. Neste escenario, ante a incerteza dos traballadores, Feijóo sinalou que os datos no seu poder o levan a concluír que a empresa “ten que seguir unida”.

Díxoo en resposta ao voceiro parlamentario de En Marea, Luís Villares, quen aproveitou a primeira sesión de control da X Lexislatura para advertir das consecuencias que tería sobre o emprego da Costa da Morte a venda das centrais hidroeléctricas e para pedir ao mandatario que “evite” esa segregación.

Ante as súas peticións reiteradas de que reciba os traballadores para aclararlles a situación, Feijóo recordou que o seu goberno, estando en funcións, se entrevistou co comité de empresa de Ferroatlántica na mencionada bisbarra e tamén cos representantes dos operarios do centro de Arteixo (A Coruña). Ademais, deu conta de que esta mesma semana se verá cos alcaldes das zonas implicadas.

“Imos seguir en contacto cos comités de empresa e cos alcaldes e imos cumprir a lei, non teña ningunha dúbida”, replicou a Villares, sen deixar de facer fincapé en que a información que manexa lle leva a concluír que “nada modificou” a imposibilidade de que se separe a actividade enerxética de industrial.

Dito isto, e tras abundar en que a empresa non presentou ningunha solicitude, o presidente galego apuntou que sabe que Ferroatlántica (do Grupo Villar Mir) está a analizar a posibilidade de pedir unha autorización para “vender activos” e, cos fondos logrados, desenvolver plans industriais en Sabón -Arteixo- e na Costa da Morte. Malia que en ambas as dúas localizacións “esperan investimentos”, incidiu en que a normativa vixente non permite “autorizar a segregación” nos termos que se coñecen actualmente.

“DICIR NON É O MELLOR”

Tras escoitar a Feijóo, Luís Villares subliñou que eses plans industriais “poden ser moi edificantes”, pero advertiu -en liña co expresado polos traballadores- de que a segregación das centrais hidroeléctricas levaría consigo o peche das fábricas. “Dicir non é o mellor para a bisbarra e para o futuro da Costa da Morte”, defendeu o voceiro de En Marea en O Hórreo.

Adicionalmente, recordou a iniciativa parlamentaria impulsada polo PPdeG para que se fagan “os estudios técnicos e xurídicos oportunos” sobre a venda das centrais para sinalar unha vez máis que unha sentenza firme do Tribunal Supremo deixa claro que a produción de enerxía eléctrica e as ferroaliaxes non son separables, senón unha mesma actividade produtiva.

“NON LLE IMOS FALLAR”

Na súa quenda de réplica, Feijóo garantiu que “non” vai fallar aos veciños da Costa da Morte, unha bisbarra que “maioritariamente” lle deu a súa confianza o pasado 25 de setembro. “Interésannos os empregos, non os conflitos; interésanos a inversión industrial e que as empresas sigan funcionando”, resolveu.

A xeito de conclusión, deu a benvida a Villares na “preocupación” polos postos de traballo e instoulle a acudir a Ferrol “a dicir que non quere que peche Reganosa”, a pasar por Vigo para posicionarse en favor da “ampliación de Citroën” e a visitar Lugo para apoiar os investimentos para crear emprego tecnolóxico no aeródromo de Rozas.

23 de novembro de 2016 | 13:42 • Sen comentarios

Comentarios pechados.