Arden tres estanzas dunha nave abandonada en Vilaboa

Os Bombeiros de O Morrazo extinguiron a última hora deste mércores un incendio que calcinou tres estanzas dunha fábrica sen actividade situada no municipio pontevedrés de Vilaboa.

Segundo a información do CAE 112-Galicia, varios particulares alertaron pouco despois das 21,30 horas deste mércores de que se estaba a producir un incendio nunha nave de Figueirido, situada a uns 30 metros de casas.

Ata o lugar desprazáronse, ademais dos efectivos dos Bombeiros, axentes da Garda Civil e da Policía Autonómica. Tamén se puxo a situación en coñecemento do servizo provincial de incendios.

Os Bombeiros deron por extinguido o lume en torno ás 23.00 horas. As lapas calcinaron tres estanzas da nave, que resultou completamente afectada polo fume.