Un home resulta ferido grave tras sufrir unha descarga eléctrica en Mos
Un home resultou ferido de gravidade na madrugada deste xoves tras sufrir unha descarga eléctrica ao subir por unha torre na localidade pontevedresa de Mos.
Segundo a información da Central de Atención a Emerxencias 112-Galicia, o suceso aconteceu sobre as 6,30 horas na parroquia de Dornelas. Foi un veciño o que alertou da situación tras oír o estalido da descarga eléctrica e escoitar o ferido pedindo axuda.
Ata a zona desprazáronse os efectivos dos Bombeiros de Baixo Miño, de Protección Civil e da Garda Civil. Unha ambulancia do 061 trasladou o ferido, con queimaduras por todo o corpo e en estado grave, ao Hospital Povisa de Vigo.
No momento da descarga, o home atopábase subido a unha torre eléctrica, aínda que os efectivos de Protección Civil descartaron que se tratase dun traballador e descoñecen os motivos que levaron á vítima a trepar pola torre.