Prisión sen fianza para os dous xóvenes de Carballo acusados de roubar en establecementos da Costa da Morte

O Xulgado de Instrución de Garda de Corcubión decretou prisión sen fianza para os dous mozos, con identidade D.B.M. e F.S.I. e veciños de Carballo (A Coruña), detidos acusados de pertencer a un grupo criminal ao que se lle atribúen múltiples roubos en diversos establecementos de localidades da Costa da Morte, así como de Arteixo e Santa Comba.

Segundo informou este venres a Garda Civil, o arresto dos dous presuntos autores tivo lugar o xoves despois de que os investigadores localizasen un dos vehículos utilizados polos autores para cometer os feitos delituosos.

En concreto, trátase dun BMW 320 que supostamente subtraeran días antes e que escondían nunha zona boscosa do municipio da Laracha. Así, cando os axentes vixiaban o vehículo sorprenderon ‘in fraganti’ a tres homes que trataron de darse á fuga. Mentres que dous foron detidos, un deles conseguiu escapar a través do bosque e aínda non foi localizado.

A Garda Civil explicou que os roubos eran maioritariamente cometidos en establecementos de hostalaría, onde accedían ás máquinas comecartos. O grupo criminal estaría composto por uns tres ou catro xóvenes cunha alta taxa de actividade delituosa e cunha estrutura funcional moi definida.

O instituto armado non descarta novas detencións e continúa as investigacións para tratar de esclarecer todos os feitos delituosos similares perpetrados na provincia da Coruña nas últimas semanas.