publicidade hoxe
Publicidade
omeulibro1

En liberdade o patriarca dos ‘Morones’ polo seu estado de saúde

PUBLICADO EN: Noticias de GaliciaCangasLocal PortadaPortada dereita
A-
A+
Europa Press

O patriarca do clan dos ‘Morones’, Olegario G.S., que permanecía dende maio baixo arresto domiciliario, foi posto en liberdade polo Xulgado de Instrución número tres de Cangas (Pontevedra), se ben se mantén como investigado na causa, que se segue en relación a supostos delitos de extorsión en mercados de Pontevedra.

Fontes xudiciais confirmaron que o xuíz deixou en liberdade a Olegario G.S. ao ter en conta o seu estado de saúde, ao entender que a súa participación nos feitos é “menor”, porque xa finalizaron as declaracións de todas as testemuñas protexidas e porque as representacións legais destes non se opuxeron a que quedase en liberdade.

O avogado que defende a Olegario G.S. e á súa esposa Flora, Ramón Montenegro, valorou que o maxistrado estimara a súa petición -que xa era a segunda-, xa que mantén que era “innecesario” e non había “causa nin xustificación” para mantelo privado de liberdade.

Así as cousas, remarcou que as testemuñas prexudicadas “contestaron que ningún sufrira ameazas nin coaccións” por parte de Olegario G.S., quen polo seu delicado estado de saúde estivo ingresado no hospital tras a súa detención e despois de recibir a alta permanecía privada de liberdade no ámbito do seu domicilio.

O letrado indicou que ao patriarca non se lle impuxo ningunha fianza nin medidas como ordes de afastamento ou a prohibición de achegarse a algún lugar, e tan só terá que ir asinar ao xulgado os días 1 e 15 de cada mes para verificar que permanece na zona de influencia do seu domicilio e poder ser localizado se houbese que practicar algunha dilixencia.

Froito da operación da Garda Civil coñecida como ‘Operación Vida” o pasado mes de abril foron detidas 13 persoas, das que permanecen en prisión provisional os irmáns Juan Paulo, Saúl, Mariño e Sinaí Giménez. A causa séguese por supostos delitos de extorsións, ameazas, organización criminal, branqueo e contra a Seguridade Social.

DECLARACIÓNS

O avogado Ramón Montenegro avanzou que está previsto que o próximo 7 de novembro comparezan máis investigados na causa, tras o que o avogado espera que o xuíz chame testemuñas propostas polas defensas.

Neste marco de declaracións, indicou que este mércores compareceu o presidente da Asociación Galega de Ambulantes e Autónomos, Francisco Romero Alvite, quen promovera a intermediación da Fiscalía para lograr unha solución ao enfrontamento entre a familia dos ‘Morones’ e os coñecidos como xitanos ‘zamoranos’ polo mercado en Tui, e por supostas presións da ‘familia real’ xitana e o seu ámbito.

Tal e como asegurou o letrado, Romeiro Alvite foi o que puxo a “mecha” que supuxo o “detonante de toda esta historia” pero, “para sorpresa e beneplácito” da defensa, este mércores dixo que non sufrira “ameazas nin acoso de Olegario, nin da súa muller nin os seus fillos” e “recoñeceu que o desterro –de vendedores zamoranos– non fora tal, senón que fora en solidariedade cos pastores evanxélicos” supostamente expulsados polo clan dos ‘Morones’.

Nesta liña, incidiu en que o presidente da asociación recoñeceu ante o xuíz que “a culpa non é dos Morones, senón de autoridades políticas e policiais”, por non poñer os medios para que esta situación non se producise. “Dános a razón ao que vimos defendendo”, selou Montenegro.

27 de outubro de 2016 | 17:40 • Sen comentarios

Comentarios pechados.