Baltar asegura que a renuncia á militancia do alcalde procesado de Vilariño foi “libre”

O presidente da Deputación e do PP de Ourense, Manuel Baltar Blanco, asegurou que a renuncia á militancia do alcalde de Vilariño de Conso, Ventura Serra, a quen o xulgado lle abriu xuízo oral por prevaricación e delito continuado de falsidade documental foi tomada “libremente” e le “honra”.

A preguntas dos medios, Baltar Blanco dixo que se trata de”un xesto que xa dende o partido se lle dixo que o honraba para non mesturar e danar a imaxe da formación política”. Con todo, recordou que “hai unha cuestión básica e fundamental do estado de dereito, que é a presunción de inocencia”.

Ademais, o presidente do PP de Ourense, investigado por suposto delito de suborno, sostivo que ter que recordar estas cousas (a presunción de inocencia) é algo que di moito da situación e do escenario actual”.

Ao fío diso, apuntou que lle viñan á memoria outros casos como o do alcalde de Baltar, José Antonio Feijóo, quen tamén pediu esa renuncia á militancia e despois foi absolvido pola xustiza para, posteriormente, reingresar no PP.

Baltar Blanco remarcou que el cre “na inocencia de todos e que a presunción de inocencia é algo no que todos deben crer”. “E isto de que se cambie pola presunción de culpabilidade é un xogo que certamente é perigoso”, advertiu.

IRREGULARIDADES ENTRE 2012 E 2013

Os feitos polos que se abre xuízo a Ventura Serra teñen que ver cunha serie de irregularidades nos anos 2012 e 2013 relacionadas coa realización dunha de contratos asinados cunha trintena de traballadores, algúns deles por unha mesma persoa.

A Fiscalía cre que o rexedor elixía os traballadores baseándose no seu criterio persoal, “vulnerando” os principios de igualdade, mérito e capacidade.

O rexedor, para o que se decretou liberdade provisional sen fianza, exponse á petición de dúas penas de inhabilitación que suman 14 anos e a cinco anos de cárcere.