A Carreira Popular Pedestre celebrarase en Santiago o domingo 30

Presentación da carreira Pedestre. Foto: C. Paz

A 39ª edición da Carreira Popular Pedestre, organizada polo Grupo Correo Gallego e que recolle as “liñas de identidade” da cidade de Santiago, celebrarase o vindeiro domingo 30 de outubro e, até o momento, conta con 1.000 inscritos.

En concreto, o percorrido partirá de Xoán XXIII ás 10,00 horas para os maiores de 18 anos, mentres que será ás 11,30 horas para os escolares. Será o mesmo percorrido da edición anterior e estenderase durante 12 quilómetros para os maiores e sete para os escolares -a ruta estará sinalizada cunha pancarta en cada quilómetro-.

Na súa intervención, o xerente do Grupo Correo Gallego e presidente da Agrupación Deportiva ECG, Ángel Remesar, agradeceu o apoio da Xunta e o Concello de Santiago, así como doutras entidades colaboradoras -Sogama, CaixaBank, El Corte Inglés, Coca Cola, Aquabona, Gadis, Federación Galega de Atletismo e Hyupersa Santiago-. Nesta mesma liña, apuntou que a organización conta coa colaboración de máis de 500 voluntarios -Policía Local, Garda Civil de Tráfico, Policía Nacional e 061, entre outros-.

Pero ademais do xerente do Grupo Correo Gallego tamén tomaron a palabra o director de área de negocio de CaixaBank en Santiago, Antonio Lema; o delegado en Santiago da Federación Galega de Atletismo, Iván Sanmartín; a concelleira de Deportes do Consistorio compostelán, Noa Morais; e o secretario xeral para o Deporte, José Ramón Lete.

Lete, quen foi o encargado de pechar a rolda de prensa, animou aos composteláns a “correr pola saúde” e lembrou que, en Galicia, o deporte “tamén se pode facer con choiva”. A este respecto, Remesar encomendouse ao Apóstolo para que o tempo acompañe aos corredores o vindeiro domingo 30 de outubro.

CALENDARIO OFICIAL DA FGA

Esta carreira está incluída no calendario oficial da Federación Galega de Atletismo (FGA) e a participación dos corredores federados rexerase pola normativa vixente da Real Federación Española de Atletismo (RFEA).

O prazo de inscrición poderase facer online na páxina web http://carrera.elcorreogallego.es. O primeiro prazo finaliza o domingo 23 ás 24,00 horas e o custo da inscrición será de seis euros, salvo os propietarios de chip de ChampionChip, que será de catro.

Tamén se poderán inscribir nestes mesmos prazos e de forma presencial na planta de deportes de El Corte Inglés Santiago desde as 10,00 até as 22,00 horas.

No entanto, haberá un segundo prazo de inscrición os días 24 e 25 nos mesmos sitios indicados anteriormente, pero, neste caso, o custo pasará a ser de 12 euros e de 10 para os propietarios de chip.

PRAZO PARA ESCOLARES

Pola súa banda, os escolares que participen de forma individual terán a mesma forma e prazos para inscribirse que os adultos -o custo neste caso será de tres euros-. Neste sentido, cabe destacar que na carreira de escolares tamén se poderán inscribir por equipo a través do centro de ensino, club ou anpa.

Para formar un equipo terán que ter un mínimo de 10 corredores -só poderán inscribirse online e a liquidación poderase facer por transferencia bancaria-. Tamén poderán pagar en efectivo en El Corte Inglés Santiago presentando a lista completa de inscritos, que anteriormente fixesen de maneira online.

O prazo para inscribirse por equipo finaliza o xoves 20 de outubro e, a partir deste día, só se poderán inscribir de forma individual. No entanto, os escolares individuais tamén se poderán inscribir os días 24 e 25 de outubro pero, neste caso, a inscrición pasaría a ser de seis euros.

Unha vez inscritos, todos recibirán, xunto co dorsal, un chip e unha camiseta técnica, que se recomenda levar posta durante a carreira -o dorsal deberá ir suxeito na parte dianteira e o chip atado nunha zapatilla-. E é que para clasificarse deberán entrar na meta cos dous elementos ben colocados.

DORSAIS

Excepto aos equipos escolares, os dorsais entregaranse os días 28 e 29 na planta de deportes El Corte Inglés Santiago en horario comercial. Tamén se entregarán o propio domingo 30, día da carreira, na Praza do Obradoiro a partir das 8,15 horas e até 45 minutos antes de cada saída.

Pola súa banda, os dorsais dos equipos entregaranse en El Corte Inglés Santiago o xoves 27 de outubro.

No que respecta aos premios, todos os estudantes que entren en meta co control aberto recibirán varios agasallos. Así, recibirán trofeo os tres primeiros de cada unha das oito categorías, catro femininas e outras tantas masculinas, que se establecen por ano de nacemento.

Para puntuar na clasificación por equipos deberán entrar na meta un mínimo de 10 corredores, sexan da categoría que sexan. A puntuación establecerase por orde de chegada dos 10 primeiros clasificados de cada equipo -levarán trofeo os cinco primeiros clasificados e premio en metálico os tres primeiros-.

ENTREGA DE PREMIOS NO OBRADOIRO

Así mesmo, cabe destacar que todos os premios entregaranse na Praza do Obradoiro o mesmo día da carreira -os premios en metálico liquidaranse por transferencia bancaria-.

Pola súa banda, no caso dos adultos, haberá premios en metálico e trofeos para os tres primeiros corredores en liña de meta, tanto homes como mulleres.

Así mesmo, levarán trofeos os primeiros de cada categoría (seis homes e cinco mulleres). Tamén levarán premio en metálico os 15 primeiros homes clasificados e as sete primeiras mulleres -os premios en metálico faranse efectivos a través de transferencia bancaria-.

Á presentación da carreira asistiron os portavoces municipais de BNG, PSOE e PP, Rubén Cela, Paco Reyes e Agustín Hernández, respectivamente.