Técnicos de Adif, Renfe e Comboios inspeccionan o tren e as vías do Porriño para reconstruír o sinistro
Técnicos de Adif, de Renfe, e de Comboios de Portugal, así como peritos xudiciais revisan, dende primeira hora da mañá deste venres, os restos do ‘Tren Celta’ que descarrilou o pasado 9 de setembro a poucos metros da estación do Porriño (Pontevedra), co fin de comprobar os sistemas de freado, así como a sinalización da vía.
Entre as comprobacións que se pretenden realizar inclúense as probas de presión do sistema de freado do tren, dado que o maquinista non reduciu a marcha do convoi malia os avisos.
No momento do descarrilamento o tren circulaba a 118 quilómetros por hora, malia que a velocidade máxima permitida era de 30 quilómetros por hora, debido a traballos de mantemento da vía principal.
Os técnicos tamén comprobarán as condicións de seguridade dese tramo férreo, así como a sinalización que, segundo os datos rexistrados nas caixas negras (que foron abertas no xulgado o pasado 13 de setembro), estaba en funcionamento sen problemas.
TRASLADO DE RESTOS DO TREN
A máquina automotor do tren, que foi a máis danada no accidente, atopa nunha plataforma, depositada fronte á estación, á espera de que o xulgado autorice (previsiblemente a próxima semana) o seu traslado por estrada a dependencias de Renfe en Redondela (Pontevedra).
Os outros dous vagóns, que tamén están no municipio de O Porriño, serán trasladados pola vía férrea.