Dúas persoas feridas en Ordes ao tratar de apagar un incendio

Dúas persoas resultaron feridas na mañá deste xoves ao tratar de apagar un lume que se iniciou nun alpendre no termo municipal de Ordes (A Coruña). Segundo informou o 112 Galicia, os servizos sanitarios de urxencia trasladaron dúas persoas que resultaron feridas ao tratar de apagar un lume que comezou nun alpendre.

Foi ás 11,30 horas deste xoves cando un particular pedía axuda ao CAE 112 Galicia, ao indicar que ardía un alpendre no lugar do Pazo, na localidade coruñesa de Ordes.

Debido á intensidade das lapas, o lume afectou á casa dun veciño que, segundo explicaron os servizos de emerxencia alí desprazados, trataba de apagar.

Por parte do 112 Galicia, tras ter constancia de que podía haber xente afectada, ademais de requirir a intervención dos Bombeiros da bisbarra, alertou a Urxencias Sanitarias, que confirmou o traslado de dúas persoas ao centro de saúde da localidade, segundo indicaron as mesmas fontes.

A Guardia Civil e os efectivos de Protección Civil da localidade de Ordes tamén foron informados, así como o persoal da empresa subministradora de electricidade.

Os Bombeiros confirmaron que ardeu parte do alpendre no que se almacenaban apeiros, maquinaria de labranza e un depósito de gasóleo que, finalmente, puideron salvar.