publicidade hoxe
Publicidade
omeulibro1

A nai de Diana Quer pide a colaboración de quen puidera vela subir a un coche

PUBLICADO EN: Noticias de GaliciaA Pobra do CaramiñalLocal Portada
A-
A+
Europa Press

Diana López-Pinel realizou, cando se cumpre un mes da desaparición da súa filla Diana Quer na Pobra do Caramiñal (A Coruña), un novo chamamento á colaboración cidadá centrándose na hipótese de que a rapaza desapareceu tras subir nun coche. “Fago un chamamento a quen puidera vela subirse a un coche”, dixo este mércores ás portas da súa casa en Madrid.

A nai de Diana, a moza madrileña de 18 anos que desapareceu o 22 de agosto cando veraneaba en Galicia, centrou a petición de colaboración na pista dun coche. “Calquera persoa que esa noite en concreto puidese ter algún dato, por insignificante que pareza”, reclamou antes de precisar que se refería a “se a viron subir a un coche, falando con alguén”.

Diana López-Pinel agradeceu a presenza dos medios e subliñou que se trataba dun “chamamento moi importante”. Fontes da investigación consultadas explicaron que se trata dunha iniciativa adoptada directamente por ela, sen que se cursara unha petición por parte dos investigadores para reforzar esta pescuda.

TELÉFONO

Unha das liñas de investigación foi a de seguir o sinal do teléfono móbil de Diana Quer para cruzar este rastro coa comprobación de entre polo menos 15.000 matrículas de coches que circularon a madrugada da desaparición pola Pobra do Caramiñal.

Esta criba mereceu que os investigadores se desprazasen a unha zona de Rianxo a menos de 20 quilómetros da casa estival da familia de Diana e onde se levou a cabo sen éxito unha batida o 9 de setembro. A raíz do testemuño de varias testemuñas, tamén se investigou un coche negro modelo Audi A3.

“MAMÁ ESPÉRATE”

López-Pinel insistiu en que se manterá o anonimato de quen achegue algunha pista sobre o paradoiro da súa filla, pedindo que se poñan en contacto coas forzas de seguridade e coa plataforma SOS Desaparecidos.

Ademais, aproveitou para mostrar a súa solidariedade co resto de familias que buscan un ser querido. “Unha situación que nos doe no corazón”, dixo entre bágoas, “dá igual se vive nunha casa mellor ou peor”.

“Se me pode ver ou sentir, Diana,”, concluíu López-Pinel, “mamá ámate, mamá espérate, e mamá búscate e vaite buscar ata que aparezas”.

21 de setembro de 2016 | 16:08 • Sen comentarios

Comentarios pechados.