A Fundación Deporte Galego convoca a segunda fase das axudas para deportistas de alto nivel

A Fundación Deporte Galego convocou onte, a través do Diario Oficial de Galicia, a segunda fase das axudas para deportistas galegos/as de alto Nivel, baixo a denominación de Axudas DGAN 2016.

Esta convocatoria enmárcase no habitual Plan de axudas á preparación de deportistas galegos/as de alto nivel, e á vez ten en conta que este ano 2016 tiveron lugar os Xogos Olímpicos/Paralímpicos de Río 2016. Por esta singularidade e co fin de optimizar as axudas de xeito que sexan o máis operativas e beneficiosas para os deportistas destinatarios, estableceuse unha convocatoria en dúas fases: a primeira iniciouse no mes de abril para os deportistas que acadaran a súa clasificación para os Xogos de Río e no día de onte iniciouse a segunda.

Tal e como se indicaba nas bases que regularon a primeira fase das axudas, trala finalización dos Xogos Olímpicos/Paralímpicos, convócase a segunda fase, orientada ao resto de deportistas con recoñecemento pola Secretaría Xeral para o Deporte coma Deportistas Galegos/as de Alto Nivel no ano 2016, que non foran beneficiarios da convocatoria da primeira fase.

Segundo as bases dispoñibles na sede da Fundación Deporte Galego e na web deporte.xunta.gal, o prazo de presentación de solicitudes será dun mes contado desde o día seguinte ao da publicación do anuncio da convocatoria no Diario Oficial de Galicia. Ao abeiro desta convocatoria os beneficiarios poderán recibir ata 3.000 euros de axuda.