publicidade hoxe
Publicidade
omeulibro1

A Deputación asina un convenio co concello da Illa de Arousa para a posta en valor da senda Bao-Xastelas

PUBLICADO EN: Noticias de GaliciaA Illa de ArousaPontevedra
A-
A+

A presidenta da Deputación de Pontevedra, Carmela Silva, e o alcalde da Illa de Arousa, Carlos Iglesias, asinaron esta mañá no Pazo Provincial un convenio de colaboración para a posta en valor da Senda Bao-Xastelas, un dos once sendeiros azuis recoñecidos na provincia de Pontevedra, a provincia de España con maior número de distintivos deste tipo.

Tras a sinatura, Carmela Silva resaltou que, precisamente estes datos, demostran que a provincia de Pontevedra está á vangarda na excelencia de recursos naturais e paisaxísticos, polo que convidou a outras Administracións, como a Xunta de Galicia ou o Goberno de España, a “habilitar partidas, con criterios claros e equitativos, que tamén aporten para a mellora e o acondicionamento dos sendeiros azuis”. Silva explicou que o obxectivo é apostar de verdade por aquilo que nos está convertendo nun referente no conxunto de España.

A presidenta asegurou que é imprescindible apostar pola posta en valor dos once sendeiros azuis da provincia porque “son unha das grandes riquezas que temos que preservar e mellorar”. Explicou que se debe traballar na súa valorización por dous motivos fundamentais: primeiro, para que os veciños e veciñas de cada zona, e pontevedreses en xeral, poidan usar e gozar da paisaxe e dos recursos da provincia nas mellores condicións, e segundo, porque agora a paisaxe e os recursos naturais son un dos atractivos turísticos máis demandados polos visitantes. Polo tanto, “apostar pola mellora dos nosos valores naturais é apostar tamén pola creación duns recursos cada vez máis atractivos para os que nos visitan”, manifestou Silva.

O alcalde da Illa, Carlos Iglesias, cualificou de “fito histórico” a sinatura deste convenio, xa que é a primeira vez que unha Administración distinta ao propio concello se decide a investir nos sendeiros azuis da provincia. Iglesias amosou o seu agradecemento á Deputación de Pontevedra e resaltou a súa importancia, “xa que aos concellos cústanos moitos cartos todos os anos o mantemento e a mellora dos sendeiros azuis”.

Segundo o convenio asinado, as actuacións que se van acometer na Senda Bao-Xastelas consisten na realización de traballos de acondicionamento necesarios neste sendeiro, que bordea a illa dende a praia de Bao-Camaxe ata o espazo natural de Carreirón. En concreto, acométense accións de sinalización, incluíndo o subministro e instalación de sinais e paneis de información e identificación da ruta e dos seus valores naturais. O orzamento total é de 16.666,66 €, dos que a Deputación aporta o 80%, en concreto 13.333,22 €, mentres que o municipio da Illa achega o 20% restante, 3.333,33 €.

Este convenio enmárcase no plan conxunto que ten a Deputación, en colaboración cos concellos, para a posta en valor dos sendeiros azuis da provincia, cun investimento global de 183.333,26 €, dos que a Deputación aporta o 80% e os municipios o 20%. Este é o sexto convenio deste tipo asinado, despois de Ponte Caldelas, Nigrán, Baiona, A Guarda e Cangas.

Proximamente asinaranse os convenios para mellora dos restantes sendeiros azuis da provincia: Cabo Udra (en Bueu), Sendeiro Azul Ruta das Praias (en Marín) e os tres que existen en Vigo (Camiño a Beiramar, Senda entre Faros, Senda Litoral e do Monte da Guía). Os sendeiros azuis son rutas que enlazan praias ou portos con bandeira azul con elementos naturais do seu contorno, contribuíndo así ao uso sostible do litoral.

21 de setembro de 2016 | 17:19 • Sen comentarios

Comentarios pechados.