The Chemical Brothers actuarán o 30 de outubro en Santiago
The Chemical Brothers, que a semana pasada anunciaban a súa participación no festival BIME Live de Bilbao o 29 de outubro, suman tres novas datas á súa xira española: Barcelona (Poble Espanyol, 27 de outubro), Madrid Live! (Barclaycard Center de Madrid o 28 de outubro) e Santiago de Compostela (Multiusos Fontes do Sar, 30 de outubro).
A cita na capital galega formará parte da programación de ‘Latitudes’, un ciclo musical posto en marcha por Turismo de Galicia no marco da celebración do Ano da Misericordia. O seu obxectivo é ofrecer tanto aos galegos como aos turistas e peregrinos que visitan a comunidade neste período de celebración un valor engadido á súa ampla oferta turística, segundo explica a axencia Esmerarte.
As entradas para Bilbao xa están dispoñibles en www.bime.net. Para o resto de datas poderanse comprar desde este venres 2 de setembro en diferentes puntos: para Barcelona en Ticketea, Ticketmaster, entradas.com e www.lasttour.net; para Madrid en www.madridlive.net e www.barclaycardcenter.es e para Santiago en Clicentradas e entradas.ataquilla.com.
A carreira de Tom Rowlands e Ed Simons prolóngase durante máis de 25 anos e a crítica é unánime ao consideralos os máximos responsables do éxito masivo da electrónica hoxe en día.
Cun número incontable de xiras e éxitos ás súas costas e unha espectacular posta en escena, os británicos gañáronse con suor ser un das cabezas de cartel máis cobizados dos festivais de todo o mundo.
Co seu big-beat con house, techno, trip-hop, rock electrónico, dance alternativo e os últimos hits do seu disco, ‘Born In The Echoes’, chegarán a Barcelona, Madrid, Bilbao e Santiago. Tampouco faltarán os seus éxitos de sempre, que farán dos concertos “citas difíciles de esquecer”, destacan os promotores.