Retiran en dous meses a metade de niños de velutina que en todo o ano pasado en Cambre

O Servizo de Emerxencias e Protección Civil de Cambre (A Coruña) retirou dende o pasado 6 de xuño 140 niños de avespas asiáticas, coñecidas como velutinas, fronte aos 238 niños que se retiraron en todo o ano pasado, segundo informa a Casa do concello.

Así, en solo dous meses Protección Civil de Cambre retirou máis da metade de niños que en todo o exercicio anterior, sinala o goberno local, que pon de manifesto a súa “proliferación”.

Os servizos municipais admiten que aínda existen avisos de veciños sobre niños que non foron eliminados “pola falta de efectivos”. Non obstante, aconsellan aos cidadáns “non retirar os niños ata a chegada dos profesionais.

Así, remarcan que é de “vital importancia que ao destruír o niño se ache no seu interior a raíña do enxame”. Por outra banda, destacan a súa preocupación “polo aumento” da presenza desta avespa “que xa destruíu centos de colmeas de abellas e que presenta unha grave ameaza para o medio”, remarca o goberno local.