Enviar a un amigo
Opinar
ImprimirPermanece activo un incendio forestal en Santiago e estabilizado outro en Entrimo
A Consellería do Medio Rural informou dun incendio forestal que permanece activo na bisbarra de Santiago de Compostela, así como doutro, estabilizado, no municipio ourensano de Entrimo.
Segundo precisou a Xunta, o lume que afecta a Santiago iniciouse sobre as 1,30 horas da madrugada deste mércores na parroquia de Santa Cristina de Fecha e, polo momento, permanece activo.
No lugar traballan nove axentes, 13 brigadas, 10 motobombas e dous avións. Segundo as primeiras estimacións, a superficie afectada supera as 20 hectáreas.
Por outra banda, ás 9,30 horas quedou estabilizado un incendio rexistrado na parroquia de A Illa, en Entrimo, dende as 22,15 horas do martes.
No control deste lume traballan tres axentes, sete brigadas e cinco motobombas. A superficie calcinada supera tamén as 20 hectáreas.
CONTROLADO O LUME DE MONTERREI
A Consellería do Medio Rural dá por controlado dende as 22,06 horas do martes o incendio iniciado na tarde do pasado venres no concello ourensano de Monterrei, concretamente na parroquia de Vilaza.
Segundo as estimacións provisionais, as lapas arrasaron máis de 170 hectáreas, das que 12 son de arboredo e o resto de monte raso. Na extinción deste incendio traballan un técnico, 32 axentes, 47 brigadas, 27 motobombas, sete pas, oito helicópteros e seis avións.
