publicidade hoxe
Publicidade
omeulibro1

Medio Rural traballa na primeira concentración parcelaria entre dúas provincias nos concellos de Padrón e Pontecesures

PUBLICADO EN: Noticias de GaliciaA CoruñaLocal PortadaPadrónPontecesuresPontevedra
A-
A+

A conselleira do Medio Rural, Ángeles Vázquez, participou esta mañá nunha charla informativa no concello de Padrón para explicar aos veciños de Herbón e de Pontecesures o proceso dunha posible concentración parcelaria entre ambos municipios. Trataríase da primeira reestruturación da propiedade feita entre dúas provincias diferentes feita, ademais, a petición dos residentes nestes núcleos.

En concreto, e a falta dos informes técnicos definitivos, dous terzos da extensión afectada estaría no concello de Padrón, provincia da Coruña, mentres que o outro terzo en Pontevedra, no municipio de Pontecesures. Esta concentración compaxinaría os cultivos de viñedo e horta.

A conselleira estivo acompañada polo alcalde de Padrón, Antonio Fernández Angueira, e o alcalde en funcións de Pontecesures, Ángel Manuel Souto Cordo. Durante a súa intervención, Ángeles Vázquez resaltou a importancia deste tipo de procesos para, entre outras cuestións, aumentar a base territorial das explotacións e darlles así máis rendibilidade. Ademais, a través das concentracións parcelarias mellórase a mobilidade entre núcleos de poboación e o acceso ás fincas e vivendas.

A Consellería do Medio Rural conta este ano cun orzamento de 22 millóns de euros plan de mellora da estrutura territorial agraria de Galicia. Con esta achega preténdese seguir avanzando nos procesos de reestruturación abertos na nosa Comunidade, que afectan a unha superficie total de 119.003 hectáreas, co obxectivo de que todas estas zonas estean en disposición de seren rematadas nos próximos 4 anos.

20 de xullo de 2016 | 17:40 • Sen comentarios

Comentarios pechados.