A Consellería de Educación investirá 330.000 euros na ampliación do IES Laxeiro de Lalín
A Consellería de Cultura, Educación e Ordenación Universitaria investirá máis de 330.000 euros na ampliación do IES Laxeiro de Lalín co obxectivo de ampliar a biblioteca, dar resposta ás necesidades dos ciclos de FP –que coa Lomce pasan a ter 2.000 horas– e da FP Básica, así como para poñer en marcha un viveiro de empresas no centro. A licitación da obra, que sae publicada hoxe no DOG, vén a confirmar o compromiso adquirido polo conselleiro Román Rodríguez co director do instituto o pasado mes de abril, cando lle comunicou que se levaría a cabo esta actuación neste mesmo ano.
Deste xeito, a ampliación supón crear un volume sobre a zona administrativa existente para unificar alturas e poder albergar espazos de ampliación de uso segundo o programa de necesidades. Deste xeito, na planta baixa adecuaranse os espazos para albergar o viveiro de empresas e ampliarase a biblioteca no espazo antes asignado á sala de profesores e á sala de informática, co fin de dotala de salas independentes e maior versatilidade.
Pola súa banda, en planta alta localizarase unha sala de profesores, dúas aulas de nova creación, un aseo de profesores e dous despachos (un de dirección e outro de secretaría). Os traballos teñen un prazo de execución de catro meses. Os detalles da licitación poden consultarse no seguinte enderezo web http://www.xunta.gal/dog/Publicados/2016/20160714/AnuncioG0164-080716-0005_gl.html
Primeiro viveiro nos centros de Deza
Trátase dunha ampliación de vital transcendencia para o instituto, posto que contará co primeiro viveiro de empresas dentro dos centros educativos da comarca de Deza. De feito, un dos obxectivos da Consellería pasa por ampliar a cobertura territorial da Rede de Viveiros, que agrupa un total de 19 espazos e actualmente está integrada por centros das sete grandes cidades e concellos onde hai un CIFP.
Por tanto, e ademais de ser o primeiro centro educativo da comarca de Deza que contará cun viveiro de empresa, o IES Laxeiro de Lalín tamén senta as bases da nova senda de implantación destes espazos de emprendemento, máis alá das cidades e dos Centros Integrados de Formación Profesional.
Berce do emprendemento
Cómpre lembrar que os viveiros de empresa son unha ferramenta fundamental para fomentar o emprendemento entre o alumnado e mellorar, en consecuencia, a súa inserción laboral unha vez saian ao mercado de traballo. De feito, moitas das iniciativas empresariais xurdidas nestes espazos tiveron continuación como proxecto de negocio fóra do viveiro.