A CNMV avanza que Pescanova volverá cotizar

A presidenta da Comisión Nacional do Mercado de Valores (CNMV), Elvira Rodríguez, avanzou este luns que Pescanova volverá cotizar pronto, pero advertiu de que, para que iso suceda, deberá dar información ao mercado “do que é e de como vai evolucionar”.

“Estamos nos últimos estadios para que a acción poida volver cotizar”, afirmou Rodríguez durante a súa intervención no Foro Aragonex, onde apuntou que se non se cumpren todas as garantías esixibles, o supervisor non permitirá o regreso da compañía ao parqué.

A presidenta da Comisión fixo un repaso pola historia de Pescanova dende o ano 2013, cando, minutos antes de que vencese o prazo para que as cotizadas presentasen as súas contas, a compañía anunciou que non chegaría a tempo e solicitaba a suspensión da cotización das súas accións.

“Seguimos traballando para recuperar unha compañía coa que crecemos. Espero que se recupere e volva cotizar”, desexou Rodríguez, quen indicou que, no seu día, o caso de Pescanova xerou unha “alarma social” que levou á CNMV a actuar para impedir que arrastrase a todo o mercado.