Educación ampliará os talleres do módulo de FP de Fabricación Mecánica do IES Johan Carballeira de Bueu

Cores Tourís na visita ao IES Johan Carballeira de Bueu

O delegado territorial da Xunta en Pontevedra, José Manuel Cores Tourís, visitou esta mañá o IES Johan Carballeira de Bueu onde a Consellería de Educación executará a ampliación dos talleres do módulo de FP de Fabricación Mecánica durante este verano cun orzamento de 250.000 euros.

O delegado estivo acompañado nesta visita polo alcalde da localidade, Félix Juncal, así como polo xefe territorial de Cultura e Educación, César Pérez Ares, e pola portavoz do PP deste concello, Berta Pérez. Cores Tourís aproveitou a visita para felicitar ao IES Johan Carballeira pola celebración dos seus 25 anos de existencia.

As obras suporán a nova construción de 120 metros cadrados nos cales instalaranse os talleres deste módulo de Formación Profesional, ampliándose tamén o seu acondicionamento acústico.

Este proxecto, segundo apuntou Cores Tourís, “englóbase dentro do Plan de dotación de infraestruturas educativas 2016-2020 anunciado recentemente polo conselleiro de Cultura e Educación, como parte dos recursos obtidos a través do Fondo de Superávit de Responsabilidade co que o Goberno central recompensa á nosa comunidade autónoma por ter cumprido o obxectivo de déficit”.

As obras previstas para este instituto de Bueu, como as que se levarán a cabo este verano noutros centros de Pontevedra, responden a unha priorización en función de 4 criterios técnicos, nomeadamente os de seguridade, utilidade, accesibilidade e habitabilidade; sendo todas elas obras determinadas a partir das avaliacións realizadas polas unidade técnicas da Consellería. “A nosa provincia verase beneficiada con un total de 14,1 millóns de euros, executándose obras de mellora e ampliación en 134 colexios e institutos”, engadiu o delegado territorial, quen matizou que “no caso de Pontevedra, as necesidades orixinan actuacións máis integrais e de maior envergadura que noutras zonas de Galicia, polo que esta provincia concentrará o 35,5% dos recursos económicos”.

O alcalde da localidade agradeceu a colaboración da Xunta para a execución destes traballos que permitirán consolidar unha oferta formativa neste instituto. Félix Juncal aproveitou a visita do delegado territorial para demandar a instalación dunha pasarela por riba do regato que enlaza o centro educativo con unha parcela municipal que podería servir como lugar de ocio. Cores Tourís destacou que trasladará esta demanda á Consellería de Medio Ambiente para que analice a viabilidade da mesma.

A Consellería de Educación leva investidos nos diversos centros educativos de Bueu case dous millóns de euros nos últimos anos, co obxectivo de mellorar e ampliar as instalacións, “o que ven a demostrar o apoio da administración autonómica con este municipio nunha época complicada como foi o da crise”.