O acusado de agresión sexual a dúas peregrinas en Mazaricos acepta 3 anos de prisión

O home acusado de agresión sexual a dúas peregrinas estranxeiras no Camiño de Santiago ao seu paso polo termo municipal de Mazaricos (A Coruña) aceptou unha pena de tres anos de prisión tras recoñecer os feitos.

Inicialmente o Ministerio Fiscal solicitaba oito anos e medio de prisión por delitos de agresión sexual, intento de violación e intento de roubo con violencia; aínda que finalmente se chegou a un acordo este martes entre as partes polo que se reduciu a pena ata os tres anos de cárcere -un ano polo delito de agresión sexual e dous polo intento de violación-.

Ademais da pena de prisión, o home, que este martes recoñeceu os feitos na Audiencia Provincial da Coruña, terá que afrontar unha indemnización de 5.500 euros.

O xuízo, que xa fora suspendido en outubro, non se chegou a celebrar ao chegar a un acordo as partes. Segundo o escrito da Fiscalía, o home abordaría “con propósito sexual” dúas mulleres que, en diferentes períodos de tempo, realizaban o Camiño de Santiago. As agresións sexuais producíronse no termo municipal de Mazaricos (A Coruña).

O primeiro dos feitos remóntase a maio de 2010, cando o home, con antecedentes penais por violación, abordou unha muller italiana que se atopaba realizando o Camiño de Santiago ao seu paso por este municipio.

Dous meses máis tarde deste primeiro suceso, en xullo, e tamén cun “propósito sexual”, o acusado abordou de novo outra peregrina, unha cidadá francesa. Ambas as dúas mulleres, que sufrirían tocamentos por parte deste home, lograron escapar.