publicidade hoxe
Publicidade
omeulibro1

Máis de 200 escolares asisten á exhibición de cetrería con motivo do Día Internacional dos Museos no Castro de Viladonga

PUBLICADO EN: Noticias de GaliciaCastro de ReiLocal Portada
A-
A+
Raquel Arias na exhibición de cetrería

Raquel Arias na exhibición de cetrería

Máis de 200 escolares asistiron esta mañá no Castro de Viladonga, en Castro de Rei, a unha exhibición de cetrería organizada pola Consellería de Cultura, Educación e Ordenación Universitaria para conmemorar o Día Internacional dos Museos, que se celebra hoxe.

A cita, á que tamén acudiron a delegada territorial da Xunta, Raquel Arias, e a directora do Museo Arqueolóxico do Castro de Viladonga, Elena Varela, enmárcase dentro dun programa de actividades que se desenvolve ao longo desta semana no centro, e entre as que se inclúe unha nova edición da Noite dos Museos e a súa clásica visita nocturna ao castro.

Na exhibición, de acceso libre, estiveron presentes escolares do CEIP Ramón Falcón, de Castro de Rei; do CEIP Avelino Díaz, de Meira; do colexio de Fingoi, de Lugo, e alumnos de 1º de BAC do IES Universidade Laboral da Coruña.

O Museo Arqueolóxico do Castro de Viladonga desenvolve unha importante labor didáctica e pedagóxica, especialmente ao longo do curso escolar, atendendo visitas de alumnos de colexios lucenses e de fóra da provincia, que reciben in situ información sobre a Galicia castrexa e o seu modo de vida.

A “Noite dos Museos”

As actividades programadas pola consellería para conmemorar o Día internacional dos Museos no Castro de Viladonga continuarán nos vindeiros días. Así, mañá xoves, día 19, está prevista a celebración dun obradoiro gratuíto de cerámica, Barroenvivo, que será impartido polos artesáns Pablo Mazoi e Macu entre as 10,00 e as 14,00 horas.

O vindeiro sábado, día 21, será a xornada que centre a maior parte das actividades do programa, entre as que destaca a “Noite dos Museos” cunha visita nocturna ao castro.

A programación para ese día inclúe tamén demostración de xogos populares a cargo do club de bolos O Cadaval, de Castro de Rei, e o obradoiro de cerámica Barroenvivo, que se ampliará nesta ocasión cunha exhibición de cocedura de pezas de barro.

Así mesmo, actuarán o grupo chairego de música tradicional Os Valouros e os humoristas musicais Cantata Vernácula.

18 de maio de 2016 | 16:47 • Sen comentarios

Comentarios pechados.