publicidade hoxe
Publicidade
omeulibro1

A Xunta compromete cos traballadores de Alcoa a súa tutela para que se garanta o futuro das plantas galegas

PUBLICADO EN: Noticias de GaliciaA CoruñaCervoLocal Portada
A-
A+
Europa Press

O conselleiro de Economía, Emprego e Industria, Francisco Conde, mostrou este martes “o compromiso de tutela” da Xunta co proceso que siga a multinacional do aluminio Alcoa, ante a incerteza dos traballadores sobre a posibilidade da venda das fábricas coas que conta na Coruña e San Cibrao (Lugo).

En declaracións aos medios tras unha reunión de dúas horas en Santiago con representantes dos traballadores das factorías galegas, Conde expresou que a Xunta estará vixiante “cun obxectivo claro de apoiar calquera decisión” que “pase pola continuidade das plantas” e “por un plan industrial” que garanta a competitividade das fábricas, despois de que Alcoa trasladara “a súa intención de redefinir a súa estratexia”.

Para iso, o conselleiro destaca “a necesidade” de que a poxa de interrumpibilidade permita cubrir “as necesidades que ten Alcoa”. Así, aposta por que sexan de carácter plurianual co fin de conseguir “unha maior certidumbre” para as compañías electrointensivas.

Neste sentido, mostra a súa vontade de mediar co Ministerio de Industria e Rede Eléctrica. Unha poxa de interrumpibilidade sobre a que “non hai datas concretas” aínda para a súa realización.

Así mesmo, a Xunta tamén se compromete cos traballadores a unha “maior interlocución” para intercambiar información cos comités de empresa e poder identificar “con maior claridade” as medidas sobre o futuro das plantas e do sistema enerxético.

Ademais, mostrou toda a “receptividade” da Xunta a colaborar coa multinacional estadounidense nun “contexto de continuidade das plantas de Alcoa en Galicia”.

“NON SABEMOS NADA”

Pola súa banda, o presidente do comité de empresa de Alcoa na Coruña, Juan Carlos López Corbacho, sinalou que trasladaron ao conselleiro a “preocupación moi grande” que hai as fábricas, polo que demandan “toda a súa intervención neste proceso” e que o tutelen” para que “desde Alcoa non fagan nada en contra do futuro e a viabilidade das plantas”.

Por iso, os traballadores esperan que a Xunta se implique” e “traslade ao Goberno calquera opción de futuro”, pois “ben sexa unha compra, un investidor ou calquera solución” para as plantas ten que estar baseado “nun proxecto industrial, con investimentos e garantías de mantemento do emprego”.

“Información non temos ningunha”, resumiu López Corbacho sobre a situación que atravesan os traballadores, polo que “está aberto todo”.

Nesta liña, o presidente do comité de empresa de Alcoa en San Cibrao, Xosé Paleo, deixou claro que non vai especular” co futuro das fábricas, pois “pode haber de todo”. “Xa sabemos o que pasou en 2014, con despedimento colectivo encima da mesa cando tiñamos problemas enerxéticos”, lembrou.

Así, aínda que o presidente de Alcoa España, Rubén Bartolomeu, visitou este martes aos traballadores de San Cibrao no marco dunha rolda de desprazamentos a varias plantas, os empregados quéixanse de que a empresa “non conta nada das intencións que ten”. “Non sabemos nada”, laméntanse.

31 de maio de 2016 | 17:24 • Sen comentarios

Comentarios pechados.