A defensa do líder dos ‘miguelianos’ asegura que non hai probas de cargo nin indicios racionais dos abusos sexuais

A avogada de Miguel Rosendo, líder dos coñecidos como ‘miguelianos’ (en prisión dende decembro de 2014 e investigado por abusos sexuais e asociación ilícita), proclamou este mércores a inocencia do seu defendido, e asegurou que, na causa, “non hai probas de cargo nin indicios racionais” do delito dos abusos sexuais “o máis grave do que se lle acusa”.

Así manifestouno a letrada ás portas do xulgado de Tui (Pontevedra), onde este mércores presta declaración unha testemuña, vinculada a Orde e Mandato de San Miguel Arcángel durante anos e que participou nas actividades organizadas polo grupo liderado por Rosendo.

A avogada subliñou que só existen tres vítimas que afirman “de primeira man” que sufriron eses abusos e que, o resto, figuran no sumario por denuncias dos pais e familiares. Ademais, indicou que moitos deses testemuños e declaracións “se”foron cambiando” a medida que “se esborrallaron” os argumentos.

Así mesmo, a defensa sinalou que hai informes forenses que avalan que non había indicios de agresións sexuais e que, dende setembro do ano pasado, prestaron declaración varias testemuñas que defenden a inocencia de Miguel Rosendo.

Nesa liña, recordou que hai varias relixiosas de Orde e Mandato traballando nunha residencia de anciáns en Bustarviejo (Madrid), e que asumiron ese servizos por mediación do cardeal Antonio Rouco Varela.

“DESTRUÍDO”

Por outra banda, a avogada explicou que o principal investigado nesta causa, e o único que está en prisión, é un home que se considera “inocente” e que, polo tanto, está “destruído”.

Así, apuntou que o está a “pasar mal” no cárcere, onde é penalizado polo resto de presos debido ao delito do que se lle acusa, e sinalou que “se”refuxia en Deus, en rezar, participar en talleres de manualidades e en axudar a outros presos”.