Queixos Feijoo obtén o certificado de Galicia Calidade para o seu queixo de tetilla

Entrega do certificado

Queixos Feijoo, de Celanova (Ourense), súmase ás empresas certificadas por Galicia Calidade e xa dispón do selo de garantía para os seus produtos amparados pola Denominación de Orixe Protexido (DOP) Queixo de Tetilla.

Queixos Feijoo, durante máis de sete décadas e tras catro xeracións, segue elaborando queixos de forma tradicional. Creada en 1949, actualmente, a empresa está consolidada en España e busca afianzarse en países como México, Portugal ou Italia.

Coa incorporación desta nova compañía, Galicia Calidade conta na actualidade con queixos de tres denominacións de orixe protexida: Queixo de Tetilla, Arzúa Ulloa e San Simón da Costa. O certificado de uso, con validez para os próximos tres anos, permitirá a Queixos Feijoo incluír o distintivo nas etiquetaxes, así como nas diferentes accións de promoción que leve a cabo.

Na actualidade son máis de 300 produtos certificados e 72 empresas diferentes, cunha forte presenza no sector alimentario, as que contan coa insignia de Galicia Calidade.

ENTREGA DO DISTINTIVO

A directora xeral de Comercio, Sol Vázquez Abeal, acompañada polo xerente de Galicia Calidade, Alfonso Cabaleiro, entregaron este xoves o certificado de garantía dependente da Consellería de Economía á empresa Quesos Feijoo.

A directora de Comercio resaltou no acto de entrega a aposta pola calidade das empresas galegas como estratexia para poder competir nos mercados máis esixentes. Tamén destacou que este esforzo contribúe a reforzar a economía galega, xa que transmite no exterior un xeito diferente de traballar en Galicia, o compromiso co esforzo, o respecto pola tradición e a aposta pola innovación.