Miguel Tellado pide respecto para o aeródromo de Rozas
O voceiro do PPdeG, Miguel Tellado, pediu a AGE “respecto” para o aeródromo de Rozas e sinalou que, “os que fan do paro un negocio político”, non son “os máis axeitados” para orientar a política industrial da Xunta.
O voceiro popular asegurou, nun comunicado, que AGE ten “unha obsesión clara por ir en contra dos investimentos de empresas privadas en Galicia”, e recordou o intento da devandita formación por “bloquear a ampliación da planta” PSA Peugeot-Citroën en Vigo, que posibilitaría “unha enorme carga de emprego para a cidade”.
Ademais, Tellado recordou que “AGE e os partidos dos que procede estiveron en contra do acordo con Pemex”, igual que agora “se opoñen” á inversión de 75 millóns de euros que situarán a Galicia como “referente nacional e internacional” na investigación no campo dos avións non tripulados.
“AGE está en contra de calquera proxecto que xere emprego e riqueza para Galicia, algo propio dun partido que se alimenta da desesperanza da xente e das persoas que están ao límite por non ter traballo,”, esgrimiu.
Ao seu xuízo, o voceiro popular sinalou que o feito de que se cuestionen criterios de adxudicación “coñecidos dende hai oito meses” evidencia “ou que non se consultaron os pregos por preguiza, que sería moi grave”; ou que “facéndoo non atoparon nada irregular e intentan ensombrecer o proceso agora e sen ningún motivo, algo máis grave aínda”.
Para Tellado, AGE volveu a actuar unha vez máis de forma “totalmente irresponsable” ao “mentir e verquer falsidades” sobre unha dos investimentos industriais “máis importantes da historia da provincia de Lugo e de Galicia”, intentando así “manchar a imaxe da comunidade e dun proceso exemplar, que acaba de ser premiado a nivel nacional polo seu rigor e transparencia”.