Vigo arranca o Entroido co pregón de “El Sevilla” e o concerto de Mojinos Escozíos

O alcalde, Abel Caballero, e a edil de Festas, Laura Iglesias, presentaron este martes a programación, que celebrará o sábado -se o tempo o permite- o desfile de comparsas e carrozas e contará durante cinco días cos tradicionais merdeiros, animacións de rúa, concurso de disfraces, unha carreira popular, orquestras como a París de Noia e unha ampla oferta para os máis pequenos.

PROGRAMACIÓN ENTROIDO VIGO 2016

O goberno de Vigo comeza este venres a celebración do Entroido 2016 con “El Sevilla” como pregoeiro e o posterior concerto da súa banda, Mojinos Escozíos, na Porta do Sol, desde as 20:15 horas. O alcalde de Vigo, Abel Caballero, presentou este martes a programación municipal, xunto á concelleira de Festas, Laura Iglesias.

Este venres, 5 de febreiro, terá lugar animacións de rúa en Príncipe e Porta do Sol, de 18 a 20 horas, cando dará comezo a entronización do Meco, o pregón e o concerto, todo na Porta do Sol.

Para o sábado, o goberno de Vigo programa novamente animacións de rúa mais de 17 a 18 horas, momento no que comezará, se o tempo é favorable, o desfile-concurso de comparsas e carrozas, que fará o percorrido habitual, desde a rotonda de Isaac Peral en García Barbón, Policarpo Sanz e final na Porta do Sol. A Orquestra Miramar pechará a noite do venres coa súa actuación, ás doce horas, no escenario de Porta do Sol.

Os merdeiros rondarán o centro histórico da cidade pola mañá e pola tarde do domingo, día no que se disputará unha carreira popular pola cidade (desde as 11 horas para adultos e veteranos, con saída e chegada na Porta do Sol) e unha proba infantil pola rúa do Príncipe (desde as 11:15h). Pola tarde, animacións de rúa en Príncipe, Porta do Sol e na Praza da Princesa e, para os máis pequenos, actuación de A Gran Barafunda ás 17 horas na Porta do Sol e chocolotada infantil desde as seis da tarde.

O luns, as animacións de rúa de 17 a 18 horas en Príncipe e na Porta do Sol darán á primeira xornada do entroido infantil nas dependencias do Concello. De 17 a 20 horas no vestíbulo do Auditorio Municipal, obradoiros infantís (O Gorro Louco, Anteface Comestible e Globoflexia); ás 17 horas a actuación “Preséntame un Pallaso” na lonxa do Concello e, desde as 18 horas, concurso de disfraces categorías infantil individual e grupo infantil conxuntado (ata 13 anos), con inscrición na mesma lonxa do Concello de cinco a seis da tarde.

O martes comeza cos merdeiros no centro histórico pola mañá e pola tarde, animacións de rúa desde as 17 horas en Príncipe e Porta do Sol e a segunda xornada do entroido infantil no Concello. Nas dependencias municipais continuarán os obradoiros infantís (maquillaxe, manualidades e Buscando a Wally) no vestíbulo do Auditorio Municipal, de 17 a 20 horas, a actuación de “A Maxia de Xabi” desde as 17:30 horas na lonxa do Concello e o concurso de disfraces, individual e grupo conxuntado, para maiores de 14 anos desde as 18:30 horas, coa inscrición desde unha hora antes.

A noite do martes sumará animación de rúa, desde as 22:30 horas, da Praza da Constitución á Porta do Sol, como acompañamento da queima do Meco, que sera ás once da noite. A orquestra París de Noia pechará o día con dous pases, un de 22 a 22:30 horas e un segundo desde as doce á unha da madrugada.

O mércores conclúe o entroido vigués coas exequias funerarias solemnes das comparsas, na Porta do Sol ás 18 horas, co acompañamento e dó da comitiva ás 18:30 horas (con percorrido desde Porta do Sol, Príncipe, Colón, Policarpo Sanz e final na Porta do Sol), e o sepelio do Meco, tamén na Porta do Sol ás 19:30 horas. Péchase a xornada cos oficios laicos, responsos e sermóns, e coa lectura da acta do xurado e entrega dos premios dos concursos de comparsas e carrozas.