Unha filla de Lupe Jiménez pide perdón a todos os participantes no xuízo pola agresión ao acusado

Unha das fillas de Lupe Jiménez, a muller pontevedresa asasinada supostamente polo seu marido hai dous anos, pediu este xoves “perdón” a todos os participantes no xuízo polo crime tras a agresión ao acusado que protagonizaron familiares da falecida o mércores, aínda que non fixo o mesmo co seu pai. “Pídolle perdón a todas as persoas que estabamos alí, menos a el”, resumiu.

Esmeralda Jiménez, que ratificou que renuncia a empregar o apelido do seu pai, acudiu este xoves até a Audiencia Provincial de Pontevedra en compañía do avogado que exerce a acusación particular e que asistiu á última sesión do xuízo polo asasinato de Lupe Jiménez.

Ás portas dos xulgados, a muller quixo pedir desculpas pola agresión a José Luís C.R. que varios familiares protagonizaron dentro da sala este mércores e que levou ao tribunal a continuar as sesións a porta pechada.

Dirixíndose aos medios de comunicación, Esmeralda Jiménez pedido “perdón ao xuíz, ao fiscal e ao xurado popular” polos momentos de tensión vividos na sala, que atribuíu “a un arrebato”, en referencia á xustificación que o propio José Luís C.R. deu sobre o asasinato da súa muller ante o xurado.

“Foi moito o que aguantamos, foron dous anos esperando, foi moita coraxe o que temos acumulado”, dixo a filla da vítima, quen continuou precisando: “Pídolle perdón a todas as persoas que estabamos alí, menos a el”.

“XAMAIS” VERÁ AOS SEUS FILLOS

Do mesmo xeito, a muller rexeitou o perdón que na primeira sesión do xuízo pediu o acusado aos seus fillos. “Xa por moitos perdóns que haxa, ela xa non está aquí, e el está a respirar e está a comer. Só quero dicirlle que xamais da vida vai ver aos seus fillos”, sentenciou.

O avogado da acusación particular, Víctor Bouzas, explicou que solicitou á familia Jiménez “que se manteña a calma”, á vez que reiterou o “respecto absoluto” ao tribunal. Bouzas pediu que se entendan” as “connotacións deste caso” que, segundo dixo, foi un “axustizamento en toda regra” por parte dun acusado que “presentaba uns celos enfermizos”.