Elena Candia integrará ao alcalde de Vilalba na súa executiva

A candidata á Presidencia do PP de Lugo, Elena Candia, avanzou que, de ser elixida no congreso do próximo 6 de marzo, incorporará ao comité executivo ao alcalde de Vilalba, Gerardo Criado, e á concelleira do Grupo Municipal do PP de Lugo e doutora Encarna Amigo.

A expresidenta da Deputación e actual voceiro provincial dos populares informou nun comunicado de que “segue sumando apoios” de todas as agrupacións locais, despois de presentar o pasado venres un total de 1.450 sinaturas que avalan a súa candidatura á Presidencia do partido.

Criado trasladou o seu apoio á candidatura que encabezan Candia e Ramón Carballo, ao igual que –afirma Candia no seu comunicado- faino a Agrupación Popular de Vilalba.

Pola súa banda, a reumatóloga Encarna Amigo, que foi membro na xunta do Colexio de Médicos e na presidencia da Sociedade Galega de Reumatoloxía, é actualmente edil no Concello de Lugo, e considera o proxecto da alcaldesa de Mondoñedo o que “mellor” garante “que o partido siga sendo forte e represente a vontade da maior parte da cidadanía”.

O equipo que lidera Candia empezará este martes a súa campaña interna coa que visitará todas as agrupacións comarcais da provincia para explicar o seu proxecto e pulsar as inquietudes dos militantes. “Estamos nun momento no que queremos dar a coñecer as nosas ideas e tamén incorporar as achegas dos afiliados”, subliñou.

PORTAL WEB DE PROXIMIDADE

Por outra banda, anunciou que, se resulta vencedora no próximo conclave, porá a disposición dos lucenses todo un paquete de medidas para que os cargos públicos estean máis preto dos cidadáns e dispoñan dunha nova canle para interactuar con eles aproveitando as ferramentas que ofrecen as novas tecnoloxías e as redes sociais.

Así, unha das primeiras propostas que pretende poñer en marcha é un portal web de proximidade, que xa funciona noutras comunidades, sendo “a pioneira” en Galicia.

O obxectivo desta figura é o de trasladar o modelo anglosaxón as novas formas de facer política buscando que os distintos cargos representativos sexan máis territoriais e próximos aos problemas dos cidadáns.

“Trátase de que, no PP de Lugo, a sociedade atope unha porta aberta cos seus representantes públicos”, resolveu.