Economía, Emprego e Industria destina medio millón de euros á mellora da competitividade do parque empresarial de Vilamarín

Ángel Bernardo Tahoces na visita ao parque empresarial de Vilamarín

A Consellería de Economía, Emprego e Industria, no labor de cooperación que desenvolve cada ano coas administracións locais, está a colaborar cos concellos na habilitación e mellora de infraestruturas nos parques empresarias galegos. Neste contexto, e tal e como resaltou o director xeral de Enerxía e Minas, Ángel Bernardo Tahoces, durante a súa visita ao Parque Empresarial de Vilamarín, a través deste programa téñense destinado, desde o 2009, preto de medio millón de euros ao impulso de distintas actuacións no parque empresarial de Forcarei contribuíndo á mellora da súa competitividade.

Deste xeito, explicou Bernardo Tahoces, facilitouse a instalación dunha nave para a xestión de residuos, a implantación dun sistema de videovixilancia, o desenvolvemento dun portal web que se configura como unha rede social para as empresas do polígono, ou a mellora dos accesos ao parque empresarial, mobilizando un total de 600.000 euros. Así, só no último ano destináronse 118.000 euros á mellora da sinalización viaria do polígono e a ampliación do sistema de vixilancia, achegando a Consellería o 80% do custo da actuación.

O director xeral de Enerxía e Minas, que estivo acompañado polo alcalde da localidade, Amador Vázquez, resaltou a importancia dunha orde que desde o 2009 ten permitido desenvolver na provincia 69 proxectos que suman máis de 5,1 millóns, contribuíndo ao impulso da competitividade do tecido empresarial ourensán.

Neste contexto, Bernardo Tahoces salientou que está aberta unha nova convocatoria que suma preto de 4 millóns, podendo os concellos interesados presentar as súas solicitudes ata o vindeiro 22 de febreiro. A liña achega, un ano máis, apoios de ata o 80% do custo subvencionable, cun máximo de 120.000 euros por solicitude. Así mesmo, permítese o pago de anticipos de ata o 25% da axuda concedida.

A través desta liña promóvense diferentes accións que abarcan á dotación de servizos centralizados de xeración e subministración de enerxía de cara ao aforro e a eficiencia no gasto enerxético, novas plantas de depuración de augas, xestión de residuos, vías de acceso aos parques empresariais, instalacións de sistemas de seguridade, ou sistemas contra o roubo de cables.

O obxectivo, como apuntou o director xeral, e facer accesible aos municipios a posta en marcha de actividades que aumentan a calidade do solo industrial, co obxectivo de mellorar as infraestruturas que se lle ofrecen ás industrias para que se instalen en Galicia xerando riqueza e postos de traballo.