A familia de Lupe Jiménez trata de agredir ao acusado do seu asasinato durante o xuízo

As maxistradas da Sección Cuarta da Audiencia de Pontevedra suspenderon momentaneamente o xuízo polo asasinato de Lupe Jiménez despois de que un grupo de familiares da vítima que se atopaban na sala intentasen agredir o acusado. O incidente produciuse sobre as 13.00 horas deste mércores, mentres se estaba a tomar testemuño aos axentes que participaron na investigación deste caso.

Os funcionarios da Audiencia trataban de facer unha conexión por videoconferencia cando na Sala alguén deu un forte berro: “¡Suso “! saltando dos seus asentos tres mulleres que se avalanzaron sobre José Luis Cortiñas, autor confeso da morte a coiteladas a Lupe Jiménez.

Na sala de vistas atopábanse nese momento 6 policías nacionais e 30 familiares de Lupe Jiménez que formaron un gran tumulto arredor do procesado.

Inmediatamente numerosos axentes da Garda Civil e da Policía Nacional que se atopaban no exterior do Pazo de Xustiza acudiron para intervir en reforzo dos seus compañeiros que estaban totalmente desbordados.

Tras desaloxar a Sala, os axentes identificaron tres mulleres, unha delas irmanda de Lupe Jiménez, por ser as tres persoas que atacaron no primeiro momento ao procesado.

Segundo informou o Tribunal Superior de Xustiza de Galicia, estes incidentes foron postos en coñecemento do Xulgado de Garda. Despois dun receso de media hora, continuouse o xuízo a porta pechada coas probas periciais e os informes forenses.

O xuízo continuará mañá xoves cos informes das partes e as conclusións definitivas. De novo será a porta pechada.