O exedil de Nigrán, Vicente Costas, acóllese ao seu dereito a non declarar ante a xuíza

O construtor e exedil do PP de Nigrán, Vicente Costas Pumar, acolleuse este xoves ao seu dereito a non declarar ante a xuíza de instrución número 7 de Vigo, na peza separada da Operación Patos que afecta este municipio.

Costas Pumar, responsable da empresa Coysagran, foi citado para responder ás preguntas acerca de supostas irregularidades na adxudicación de obras á súa empresa en Porto do Molle, Praza da Carrasca e traballos en Praia América.

Segundo consta no sumario, a UDEF sospeita que este exconcelleiro e o que era entón responsable de Vías e Obras do Concello, José Álvarez Valverde (tamén investigado nesta trama), se poñían de acordo para amañar concursos, fraccionar contratos e implicar a outras contratas para que presentasen ‘presupostos de acompañamento’ nas adxudicacións e darlles así aparencia de legalidade.

Nesta peza separada, tamén son investigados outros empresarios, entre eles, o responsable de Construcións Ainxuela, Antonio V.B., que tamén estaba citado para acudir este xoves ao xulgado. Este empresario si que prestou declaración durante media hora.

Á marxe das supostas irregularidades en adxudicacións de obras públicas, nesta causa tamén se investiga a posible comisión de delito na contratación de varias persoas ao amparo dun plan de emprego subvencionado pola Deputación de Pontevedra.

MÁIS CITADOS

Ao longo das próximas semanas está previsto que pasen polo xulgado de Vigo outras 13 persoas investigadas nesta peza separada. Así mesmo, están previstas declaracións da peza separada de Ponteareas: o exalcalde, Salvador González Solla, foi citado para o 24 de febreiro; mentres que, entre o 28 de xaneiro e o 9 de marzo, prestarán declaración a exedil de Facenda, Belén Villar; a interventora e a secretaria do Concello de Ponteareas; e varios funcionarios.

No caso da peza principal, con investigados de varias administracións (Concello de Vigo, delegación territorial da Xunta, Deputación de Pontevedra e Autoridade Portuaria), algunhas das próximas persoas que terán que prestar declaración son José Manuel Figueroa (12 de febreiro), Rafael Louzán (17 de febreiro), ou os responsables de Eiriña, Enrique Alonso Pais Jaime A.V., o 3 e o 7 de marzo respectivamente.