O acusado de incendiar a casa da súa exnoiva di que o fixo porque non lle sentou ben que o deixase

Un home acusado de incendiar a casa de exparella, en decembro de 2014 en Dumbría (A Coruña), recoñeceu os feitos e argumentou que o fixo porque non lle sentou “ben” que ela o deixase tras dous meses de relación. Na primeira sesión do xuízo, na Sección Primeira da Audiencia Provincial da Coruña, o home admitiu que era culpable dos feitos que se lle imputan. “Asumín o risco”, dixo tras recoñecer que botou á casa unha botella enchida “con litro e medio de gasolina”.

Non obstante, recalcou que neses momentos “estaba mal”. “Non me sentou ben que me deixase e quería falar con ela”, sinalou o acusado Ramón V.R., quen sinalou que iso o levou a consumir alcohol e hachix.

Con todo, insistiu en que “non lle quería facer dano”. Mentres, negou que intentase sacala da estrada na noite do 6 de decembro de 2014 ou que golpease o seu coche. Pola contra, a súa exparella asegurou que o procesado a botou “fóra da estrada”.

INTIMIDACIÓN CON PISTOLA DE XOGUETE

Tamén explicou, como recolle o Ministerio Público na súa cualificación fiscal, que dous homes con pasamontañas baixaron despois do coche e a intimidaron cunha pistola, que finalmente resultou ser de xoguete, segundo Fiscalía.

Sobre o incendio na súa vivenda, dixo que, ao escoitar ruídos, espertou e dirixiuse á ventá, dende onde viu o acusado. Tamén indicou que na casa residían os seus pais e os seus avós e que temeron pola súa vida debido ao incendio.

“Era imposible saír pola porta principal”, indicou ao explicar que, finalmente, tiveron que facelo polo soto. Ademais, afirmou que, dende estes feitos, ten “medo”. “Non volvín durmir unha noite enteira”.

Na primeira sesión do xuízo, declararon os pais da muller, que ratificaron que o acusado lle mandaba mensaxes constantemente tras a ruptura, e dous axentes da Garda Civil, que confirmaron que o lume afectou a parte da entrada da vivenda.

PETICIÓNS DE CONDENA

O xuízo proseguirá este xoves coa declaración dos peritos. Na súa cualificación, a Fiscalía pide 15 anos de prisión para o procesado, en concreto 12 anos por un delito de incendio e outros tres por coaccións graves sobre a muller.

Pola súa banda, a acusación particular eleva a petición por un delito de incendio a 14 anos de prisión. Tamén reclama 8.000 euros por dano moral e que haxa unha orde de afastamento da vítima durante dez anos.