Arévalo e García de la Torre logran un acordo no deslinde entre Mos e O Porriño
Esta mañá reuníronse no Concello de Mos a alcaldesa mosense, Nidia Arévalo, a rexedora local do Porriño, Eva García de la Torre, un representante do ORAL, concretamente do Servizo de Xestión Catastral da Deputación de Pontevedra; e o secretario e interterventor municipais, para tratar o tema dos lindes entre ambas localidades.
A xuntanza caracterizouse pola boa sintonía entre ambas alcaldesas, chegando conxuntamente, Arévalo e García de la Torre, a un principio de acordo para solucionar o problema do grupo de veciños que actualmente tributa por Mos e que se consideran habitantes do Porriño.
Inícianse, polo tanto, as vías de solución da problemática con este primeiro acordo da Comisión Intermunicipal e a vindeira celebración de dúas xuntanzas de vital importancia: por unha banda convocarase unha Comisión de Deslinde á que asistan os veciños de maior idade das parroquias implicadas, tanto do Porriño como de Mos, e por outra parte as alcaldesas teñen previsto reunirse tamén, no Porriño, cos veciños porriñeses que están a tributar por Mos e queren facelo polo Porriño, porque consideran que son habitantes deste segundo Concello, como así o foron ata fai uns poucos anos.
Ambas administracións locais están a traballar xa, ademais, con Catastro en Pontevedra para axilizar os trámites administrativos previos necesarios.
Nidia Arévalo e Eva García de la Torre esperan poder realizar coa máxima rapidez posible as xestións a este respecto, para tranquilidade dos veciños e veciñas afectados/as.