publicidade hoxe
Publicidade
omeulibro1

Achan restos humanos entre os entullos dunha casa incendiada en Vilalba

PUBLICADO EN: Noticias de GaliciaLocal PortadaPortada dereitaSucesosVilalba
A-
A+
Europa Press

Os Bombeiros de Vilalba (Lugo) localizaron os corpos sen vida de tres persoas que morreron no incendio que calcinou por completo a casa na que vivían. Así o confirmou o 112 Galicia, que sinalou que pouco antes das 9,00 horas recibiu a chamada dun particular que alertaba dun lume no interior dunha vivenda situada na parroquia vilalbesa de San Simón da Costa na que residía un matrimonio de octoxenarios e unha filla de mediana idade.

Durante algo máis dunha hora, os bombeiros do parque comarcal traballaron na extinción das chamas que calcinaron por completo o inmoble. O 112 precisou que o lume provocou danos estruturais “importantes” e a vivenda derrubouse.

Por iso, ante a sospeita de que puidese haber persoas no interior, o 112 Galicia solicitou a presenza dos servizos sanitarios de urxencia da zona. En concreto, o 061 desprazou ao momento un médico de Atención Primaria e unha ambulancia asistencial, segundo indicaron fontes sanitarias.

RETIRADA DE CASCALLOS

Cando os efectivos de emerxencias comezaron a retirar os cascallos acharon primeiro os cadáveres de dúas persoas maiores e, posteriormente, o corpo sen vida dunha terceira de mediana idade. No entanto, debido ao estado dos corpos será o persoal forense o encargado da súa identificación.

Ademais dos bombeiros e dos técnicos de Urxencias Sanitarias, participaron no operativo axentes da Garda Civil e foron informados profesionais do Grupo de Intervención Psicolóxica en Catástrofes e Emerxencias (GIPCE).

1 de decembro de 2015 | 12:22 • Sen comentarios

Comentarios pechados.