A Garda Civil detivo a un veciño do Porriño roubando gasoil nos camións dunha empresa de formigóns

A Garda Civil detivo a MJ.V.L.,  de 53 anos de idade e veciño do Porriño,  como suposto autor dun delito de roubo con forza de gasoil en varios camións estacionados no interior dunha empresa formigoneira de devandito municipio.

Os feitos sucederon na noite de onte, día 27, cando se recibe unha chamada telefónica na Garda Civil informando da posibilidade de que se puidese estar a levar a cabo un roubo de gasoil nos camións dunha empresa de formigóns do Porriño.

Unha patrulla do referido Posto Principal, que se atopaba de servizo de seguridade cidadá, acode ao lugar atopando entre os camións a unha persoa xunto a dúas garrafas, unha chea e outra baleira, e unha mangueira metida no depósito do camión. 

Ao decatarse da presenza policial tenta darse á fuga sendo interceptado por un dos compoñentes da patrulla.

Acto seguido nunha  inspección visual dos camións obsérvase como os depósitos de combustible de dous deles foran forzados, permanecendo nun deles un anaco de mangueira.

Postos en contacto co xefe de seguridade da empresa, que foi quen deu a alerta, manifesta que por medio das cámaras de vídeo-vixilancia observou que esta persoa escondera catro garrafas, as cales foron localizadas detrás dunhas máquinas da empresa. 

Por todo iso procédese á súa detención e condución ás dependencias oficiais para a instrución das correspondentes dilixencias, onde se lle imputan outros tres delitos de roubo de gasoil na mesma empresa e en anteriores datas. 

O detido, que conta con antecedentes policiais, será posto a disposición do Xulgado de Instrución número TRES do Porriño.