VIÑOdiversidade en Castrelo de Miño do 19 ao 21 de novembro
O concello de Castrelo de Miño é o maior productor de uvas da denominación de orixe Ribeiro, e conta tamén con 27 adegas e colleiteiros. Ademais hai máis de 900 viticultores traballando os seus viñedos.
A vitivinicultura é a principal actividade económica, e polo tanto o concello conta tamén cunha “concellería de xestión vitivinícola” con Alfredo Fernández Rodríguez á fronte.
O concello está na ruta do viño do Ribeiro, colabora cos viticultores ofrecendo no propio concello cursos como o de “manipulador de productos sanitarios”, “riscos laborais na viña”, etc… e colabora coas adegas promocionando as marcas e viños de adegas e colleiteiros de Castrelo de Miño, levándoas a todas aquelas feiras e eventos nas que participa o concello.
A maiores de outros eventos culturais que se teñen organizado en Castrelo de Miño, como “viño+graffitti”, desde 2013 o concello organiza en verán o “RibeiroBlues WineFestival”, que en tan só dúas edicións se converteu nun gran evento no que participaron 30 adegas que deron a degustar o seu viño acompañada da mellor música Blues á beira do encoro de Castrelo de Miño.
A intención do actual equipo de goberno que leva oito anos ao fronte do concello, era tamén a de organizar outra gran feira na época de outono-inverno. Pero era necesario que fose unha feira de calidade, novidosa e distintiva.
Hai 4 anos que en Castrelo de Miño o Sindicato Labrego Galego organizaba unhas xornadas de formación en viticultura ecolóxica e biodinámica, que co paso dos anos foron achegando a Castrelo de Miño aos propietarios das mellores adegas de viticultura ecolóxica e biodinámica de Galicia.
Entón este ano 2015, aproveitando a súa presencia en Castrelo organizamos:
VIÑOdiversidade: 2 días de formación + 1 día de feira e mostra de viños ecolóxicos e biodinámicos.
O 19 e 20 de novembro, serán a xornadas de formación de viticultura ecolóxica e biodinámica, con aulas presenciais que se realizarán no auditorio do concello, e traballo en viña, con visitas a varias explotacións.
O sábado 21 de novembro, será a I Mostra Internacional de Viños da Biodiversidade. Realizarase a cuberto, nos salóns do edificio do parque náutico de Castrelo. Participarán máis de 20 adegas que nos mostrarán os seus viños. Haberá adegas galegas, españolas e portuguesas. A entrada custará 5 euros, e o horario será de 11:00 a 14:00 e de 16:00 a 20:00 horas.
Está será a primeira feira que se celebra en Galicia de viticultura ecolóxica e biodinámica, e unha das primeiras da península ibérica.
A intención do Concello de Castrelo de Miño é que se convirta nun éxito e consolidala nos vindeiros anos.
Ademáis, dentro da feira haberá un “punto de encontro para a viticultura emprendedora”. Viticultores, adegueiros e profesionais da vitivinicultura intercambiarán experiencias e traballos entre as súas viñas, adegas e técnicos”.
Por exemplo, haberá viñas que estexan en aluguer ou venda, viticultores que estexa interesado en traballalas, técnicos interesados en intercambiar experiencias de elaboración de viños e tratamento en viñedos…. Haberá tamén adegas que poden alugar un espazo dentro das súas naves, para que un colleiteiro poida elaborar alí os seus primeiros viños, etc…