publicidade hoxe

Igualdade achega a Sober a exposición ‘Cartas de amor’

PUBLICADO EN: Noticias de GaliciaSober
A-
A+

O Goberno local do Concello de Sober colabora coa Secretaría Xeral da Igualdade da Xunta de Galicia que, con motivo do Día Internacional Contra a Violencia de Xénero (25 de novembro), achega dúas actividades á localidade.

Unha delas e a exposición gráfica de ilustracións de diversos artistas sobre a violencia de xénero e a mocidade, que leva por título Cartas de Amor. A mostra estará no Centro Sociocultural de Sober desde hoxe e ata o 22 de novembro 

A segunda das actividades consiste nun obradoiro didáctico sobre igualdade que se realizará no CEIP Virxe do Carme o martes 17 de novembro. 

A exposición

Cartas de Amor é unha mostra do cómic galego sobre violencia de xénero, con debuxos de artistas  de sona como Miguel Calatayud, Patricia Castelao, Fausto Isorna, Pirusca, José Luís Méndez, Jack Mircala ou Javier Olivares. A exposición quere sensibilizar á poboación máis nova sobre a existencia de violencia nos seus modos de relacionarse, axudar a detectala e, polo tanto, a eliminala. 

Con Cartas de Amor, a Secretaría Xeral da Igualdade pretende establecer un paralelismo entre o mundo romántico das primeiras relacións de parella e a crueldade que, ás veces, vai asociada a elas, tendo en conta que, nos últimos anos, se detectan moitos casos de relacións de parellas entre adolescentes cunha forte carga de violencia verbal e incluso física.

A orixe da mostra partiu da proposta da súa comisaria, Gemma Sesar, a varios debuxantes galegos e nacionais para plasmar nunha imaxe situacións ou momentos que considerasen como violentos entre adolescentes, co obxectivo de por de manifesto a necesidade de mudar esas actitudes por outras nas que prime o respecto á parella. 

Deste xeito, na mostra están os traballos dos dous premios nacionais de ilustración, Miguel Calatayud, e de cómic, Paco Roca, no ano 2009; así como figuras galegas, como Patricia Castelao, Pirusca, David Pintor e Óscar Villán. 

Tamén participan autoras e autores que están acadando grande éxito entre a xente máis nova, como Eva Vázquez, Javier Olivares, Primitivo, Sonia Pulido, Jack Mircala ou Sergi San Julián. Ademais, o escultor Méndez, a escritora Anxos Sumai e o deseñador Fausto, únense a esta mostra con tres achegas diferentes. 

Todos e todas elas mostran no seu traballo a súa reflexión persoal sobre o que as Cartas de Amor non deben ser.

12 de novembro de 2015 | 18:06 • Sen comentarios

Comentarios pechados.