publicidade hoxe

A Xunta continúa no Porriño os contactos cos concellos da Área Metropolitana de Vigo

PUBLICADO EN: Noticias de GaliciaO Porriño
A-
A+

O director xeral de Administración Local, Alberto Pazos Couñago, reuniuse hoxe coa alcaldesa do Porriño, Eva García de la Torre, para coñecer as súas propostas e suxestións relativas á Área Metropolitana de Vigo.

Pazos Couñago lamentou profundamente que os restantes grupos da corporación municipal do concello de Porriño non foran invitados á xuntanza, tal e como se ven facendo en todas as reunión que se están mantendo cos concellos, polo que anunciou que contactará con estas forzas políticas para poder coñecer as súas propostas, ideas e suxestións con respecto á Área, intentando minimizar o retraso que poda producirse.

O director xeral avanza así a rolda de contactos cos 14 alcaldes da Área Metropolitana, e ao igual que en anteriores ocasións destacou a cordialidade do encontro ca alcaldesa e a coincidencia en varios puntos importantes como son o financiamento e un sistema de participación equilibrado.

Ademais, no tocante á Xunta de Goberno e o voto ponderado,a alcaldesa expresou a necesidade de garantir que Porriño estea debidamente representada polo que propuxo un voto ponderado corrixido, establecendo un número mínimo de concellos para a adopción de acordos.

Segundo explicou Pazos Couñago, a alcaldesa de Porriño amosou o seu interese pola implantación dun servizo de transporte metropolitano integral, coa incorporación de Vigo, para así poder optimizalo e beneficiar aos cidadáns dos 14 concellos involucrados.

Pola súa banda, o director xeral de Administración Local, Alberto Pazos Couñago, expúxolle á rexedora as ventaxas da implantación inmediata da Área Metropolitana, coincidindo ambos na conveniencia de constituíla definitivamente no menor prazo posible.

A axenda de encontros do director xeral da Xunta continuará nos concellos de Redondela, Cangas, Moaña e Vigo co obxectivo de seguir coñecendo persoalmente as propostas e suxestións dos representantes municipais e intentar acadar así o máximo consenso posible para que a Área Metropolitana bote a andar canto antes.

11 de novembro de 2015 | 17:07 • Sen comentarios

Comentarios pechados.