UPyD aposta pola regulación nacional da eutanasia

O deputado de UPyD Julio Lleonart defendeu este xoves a necesidade de aprobar unha regulación estatal sobre a eutanasia tanto pola vía activa coma pola pasiva, visto o caso de Andrea, a nena galega de 12 anos cunha enfermidade dexenerativa e irreversible para a cal os seus pais piden unha morte digna.

Ao respecto, en declaracións aos medios nos corredores do Congreso, xulgou que Galicia non está a cumprir a propia lexislación autonómica que regula os casos nos que se pode poñer fin a un tratamento.

Ao seu xuízo, os médicos que están a atender a Andrea están a incumprir a lexislación ao permitir unha prolongación dos tratamentos. “É encarnizamento médico”, apostilou.

Ademais, o deputado da formación carmesí incidiu en que é necesaria unha regulación estatal para que se un paciente fixo un testamento vital, posteriormente a familia e os profesionais médicos estean protexidos e “non sexan perseguidos polas institucións”.

ENFERMIDADE NEURODEGENERATIVA

Andrea naceu hai 12 anos cunha enfermidade neurodegenerativa grave e o seu estado empeorou o pasado mes de xuño, cando sufriu unha hemorraxia gastrointestinal que a levou ao hospital. Os médicos aseguran que non será reanimada nin tratada se xorde algunha enfermidade aguda, pero tamén indican que a súa vida neste momento non depende de ningún soporte mecánico para manter as súas funcións e que a súa única dependencia é relativa á alimentación.

Nestas circunstancias, os seus pais piden a retirada do soporte vital que permite achegar líquidos e nutrientes directamente ao estómago da nena e que esta solicitude foi avalada polo comité de ética asistencial.

O xerente do Complexo Hospitalario Universitario de Santiago (CHUS), Luis Verde, desvelou este mesmo xoves que o servizo de Pediatría está a seguir no caso de Andrea “un auto xudicial” do mes de xullo, tras un proceso iniciado polos propios facultativos; e anunciou que a súa situación actual se volverá poñer en mans da Xustiza para ver se referenda ese plan terapéutico ou leva a cabo “algunha a súa modificación”.