Un veciño de Porto advertiulle de que levaba as luces do coche apagadas cando saía de noite de Montouto o día 21

Un veciño da casa que Rosario Porto ten en Montouto (Teo), e na que os investigadores creen que se produciu a morte da menor, lembrou que o día dos feitos advertiulle á nai de Asunta de que “puxese as luces” cando a viu saír da vivenda preto das 21.00 horas, dado que, lembrou, circulaba con elas apagadas.

Durante a súa comparecencia como testemuña no xuízo pola morte da menor, de 12 anos, o home indicou que viu á nai adoptiva da nena, acusada do seu asasinato, saír da súa vivenda en Montouto pouco antes das 21.00 horas do día 21 de setembro, xornada na que se produciu a súa desaparición e morte.

Segundo contou, tanto el como a súa muller e a súa filla paráronse a ter unha “breve conversación” con Porto, apoiándose para iso no portelo do acompañante, aínda que o home non se fixou en se había algo na parte traseira do vehículo.

A preguntas das partes, a testemuña asegurou que Rosario Porto “non tiña ganas de falar” e que, tras intercambiar unhas palabras, comentoulle que “estaba moi angustiada” porque deixara ” á súa filla soa”. En ningún momento viu ese día alí a Basterra.

Ademais, o home lembrou que, ao comezar a circular, Rosario Porto non levaba postas as luces do coche, algo que era necesario para esa hora. “Vin que non levaba as luces e díxenlle: ‘Charo, pon as luces’, indicou o veciño, á vez que admitiu que esa noite había unha “visibilidade boa”.

Finalmente, a testemuña asegurou que “nunca” tivo chaves para entrar na vivenda de Montouto ou as claves para a alarma, aínda que si dispuña dunha chave do portal.