Porto recibiu unha chamada dende o seu piso despois de que Asunta saíse de casa do pai e antes de ir a Teo

Xuízo do caso Asunta

O teléfono móbil de Rosario Porto recibiu unha chamada dende o seu piso na tarde do 21 de setembro de 2013, media hora despois de que Asunta saíse de casa do seu pai e antes de que unha cámara a gravase en dirección á casa de Montouto.

Así o sinalaron os peritos da Garda Civil que analizaron os datos de conexión dos teléfonos móbiles de Basterra, Porto e Asunta, que compareceron este luns nos xulgados de Santiago dentro do xuízo que trata de esclarecer o asasinato da menor.

Ante o xurado, os axentes indicaron que a situación destes teléfonos unicamente pode establecerse con certeza ao peche das conexións de datos, con chamadas ou mensaxes, o que implica poucos datos durante a tarde dos feitos.

No relativo ao teléfono de Rosario Porto, este rexistrou unha conexión ás 14.29 horas do 21 de setembro de 2013, cando se atopaba na zona de influencia tanto do seu domicilio coma do de Basterra. Posteriormente, o móbil conectou de novo co operador as 19.29 horas dende a casa de Montouto e non rexistrou máis actividade ata as 21.52 horas, cando recibe un SMS na zona centro de Santiago.

Non obstante, o teléfono fixo do domicilio de Rosario Porto en Doutor Teixeiro realizou unha chamada ao móbil ás 17.43 horas dese día, media hora despois de que Asunta Basterra abandonase a casa do seu pai, seguida da súa nai, e pouco máis de media hora antes de que as cámaras da gasolineira da Galuresa gravasen a ambas as dúas no coche de Porto cara a Montouto. A chamada non foi contestada e, de feito, saltou a caixa de correo de voz.

BASTERRA, NA SÚA CASA

Pola súa parte, as conexións e chamadas de Alfonso Basterra dende o seu móbil limítanse a antes do mediodía e última hora da tarde de aquel día e sitúano, como el mesmo declarou, nas inmediacións do seu domicilio.

Segundo narraron os peritos, o móbil do pai da vítima recibiu unha chamada dende o piso de Rosario Porto pasadas as 12.00 horas dese día e non volveu rexistrar actividade ata as 20.43 horas, cando realizou unha chamada infrutuosa á vivenda familiar de Asunta dende o seu domicilio. Os datos da alarma da vivenda de Montouto indican que Porto estaba entón alí e abandonouna 10 minutos despois.

Trinta segundos despois da primeira chamada, Basterra realizou un novo intento de contactar coa súa exmuller, esta vez chamándoa ao móbil. Ata que unha hora máis tarde recibiu unha chamada de Rosario, Alfonso fixo un total de 10 chamadas tanto ao fixo do domicilio materno coma aos móbiles de Porto e Asunta, sen obter resposta.

O teléfono móbil de Asunta realizou a súa última conexión de datos ás 17.38 horas nas inmediacións dos domicilios dos seus pais, explica o informe, que non reflicte unha conexión para enviar unha mensaxe ‘Whatsapp’ a un grupo de amigas ás 17.25 horas. “Porque puido estar conectado a unha rede wifi”, explicaron os técnicos.