publicidade hoxe
Publicidade
omeulibro1

O veciño da pista onde apareceu Asunta asegura que se o cadáver estivese alí o vería

PUBLICADO EN: Noticias de GaliciaSantiago de CompostelaTeo
A-
A+
Europa Press
Declaración de testemuña do caso Asunta

Declaración de testemuña do caso Asunta

O propietario da única vivenda existente na pista forestal onde se localizou o corpo de Asunta Basterra asegurou este luns fronte ao xurado que pasou esa noite até tres veces polo lugar no que se atopou o cadáver entre as 23,00 horas e a medianoite, pero non viu o corpo. “Se estivese alí, xuro pola miña nai que a veríamos”, resolveu.

A primeira das testemuñas en declarar nesta quinta xornada do xuízo pola morte de Asunta contou que durante a noite do 21 de setembro de 2013 realizou xunto á súa muller un paseo pola contorna da súa vivenda, no transcurso do cal chegou a pasar até tres veces polo punto no que apareceu o corpo da nena.

Con todo, defendeu que en ningún momento viu o cadáver que, segundo relato dos feitos xusticiables, xa se atopaba alí. O home, que durante o paseo portaba unha pequena lanterna, afirmou, igual que xa fixo en instrución, que vería o corpo se estivese onde se localizou.

“Para min que a nena non estaba”, sentenciou a testemuña, quen contou que as pegadas da súa muller foron localizadas polos investigadores “a 60 centímetros da nena”, dado que paseaban pola marxe no que apareceu o cadáver, sobre un noiro sen vexetación por diante.

Aínda que recoñeceu que non “é Deus” e podería “equivocarse” neste extremo, o home defendeu que é “moi difícil” non vela nesa zona. “Se estivese aí, xuro pola miña nai que a veríamos”, resumiu.

A maiores, explicou que o luns posterior ao achado, cando realizou coa Garda Civil unha reconstrución do seu paseo, veu o señuelo -unha peza escura- que se situou onde se atopou o cadáver para comprobar se tería que vela. “Eu vin unha peza escura, pero estaba colocada máis aló de onde apareceu a nena”, sentenciou.

A SÚA MULLER TAMPOUCO VIU “NADA”

Na mesma liña, a muller da primeira testemuña, que declarou en segundo lugar, sostivo que durante esa noite non viu nada no lugar onde se atopou o corpo a pesar de que era unha “noite de lúa” na que había moita visibilidade.

Durante esa noite, os propietarios da casa viron pasar pola pista un vehículo branco, que circulou e retrocedeu até en tres ocasións -dous homes que atoparon o corpo da menor-. Así mesmo, tamén advertiron un vehículo vermello estacionado nas inmediacións da pista forestal, cun home no seu interior que falaba por teléfono, pero non lembran ver pasar outro turismo na zona durante esa noite.

O mesmo día dos feitos, a Garda Civil preguntou á muller se vira no lugar un Mercedes verde -o de Rosario Porto-, aínda que ela afirmou que non.

5 de outubro de 2015 | 11:21 • Sen comentarios

Comentarios pechados.